“Aanwijzing” òf instrukshon kiko e ta i ki balor e tin pa Kòrsou i su pueblo (Final)

WILLEMSTAD.- Ketu bai tin basta diskushon riba  e ‘aanwijzing’ ku Kòrsou a haña serka Konseho di Ministro di Reino i tambe e ‘groei akkoord’ i su benefishinan.  Den e artíkulo aki tambe EXTRA lo bai purba di duna un splikashon riba diferente dje temanan relashoná ku e instrukshon.

Kua te relashon entre e instrukshon i e akuerdo di kresementu i su benefishinan riba término?

E instrukshon su meta ta pa “obligá” un gobièrnu pa tuma e medidanan pa koregí algu ku a bai robes, den e kaso aki gastunan ku ta surpasá e entradanan ku e pais ta

produsí, kumpli ku e norma di presupuesto balansá i kompensá e défisitnan di e añanan anterior ku ta 2017 i 2018. Den e kaso spesífiko di Kòrsou no ta solamente  e défisitnan i e gastunan ta e problema, pero debí na un ekonomia ku no ta krese pa vários aña kaba e entradanan di belasting entre otro tambe a kuminsá bira ménos. Esei ta rekerí esfuersonan ainda mas difísil i fuerte. Tur kos ta mustra ku debí na problemanan den entre otro e aparato públiko i e ekonomia no ta kana manera mester ta. Pues tin ku bin ku reformanan pa koregí esaki i hasi nos ekonomia atraktivo pa invershonistanan i asina ei tambe subi bèk entradanan di belasting. Pero alabes mester tuma medidanan pa redusí gastunan innesesario i eksesivo di e aparato. Tambe tin problemanan den e fondonan sosial i di kuido i ku si nan no keda atendé pronto lo pone ku aki 10 aña nos grandinan no ta bai tin un penshun garantisá i nos niun un kalidat di kuido manera nos a kustumbrá kuné.  Pues pa drecha i koregí tur esakinan, kompañá ku sosten tékniko di Ulanda, gobièrnu di Kòrsou a firma un akuerdo di kresementu. E akuerdo di kresementu lo tin ku krea e kondishonnan pa gobièrnu por bai kumpli ku e instrukshon.

Bisando esei ta nifiká mesora ku esaki su benefishinan ta ankrá den krea espasio pa por garantisá kuido médiko pagabel i na e kalidat kustumbrá, edukashon i enseñansa na nivel, fondonan sosial saludabel pa garantisá un penshun di behes ku nos ta disponé di dje aktualmente, drecha klima di invershon pa por atraé mas invershonista i krea kupo di trabou i asina yuda drecha e kalidat di bida di nos hendenan.

Kiko ta pasa despues di e instrukshon? Kon nos ta evitá di bolbe kai den un situashon igual? 

Nos ta biba den un pais demokrátiko ku su reglanan di Trias Polítika i su “checks and balances” reglá den nos Areglo di Estado i nos otro leinan manera reglanan di kontabilidat. Komunidat ta skohe den elekshon liber ken nos ke pa representá nos i tene bista riba kon esnan ku ta goberná ta atendé ku nos sènnan di belasting. Pa yuda ku esaki tin órganonan di estado manera Konseho Sosial Ekonómiko (SER), Konseho di Konsulta (RvA), Kontrolaria general di Kòrsou (ARC) ets. Tur eseinan ta duna sufisiente hèrmènt pa representantenan di pueblo sòru pa gobièrnu kumpli ku su mandato i keda den e kuadronan legal. Pueblo tin e poder di eksigí via di prensa i otro medionan pa e representantenan aki duna nos kuenta i rason i pa nan sòru ku e tipo di kosnan aki no tuma lugá pa evitá ku ta bolbe bin instrukshon i medidanan pa bolbe koregí kosnan ku a bai robes. Pueblo tin e derechi di protesta, kaminda e ta sinti ku su derechinan ta keda violá i ta na e mesun siudadano aki pa ehersé su derechi di voto ora esei presentá pa mustra su malkontentu ku e direkshon di esnan ku a hiba pais den un situashon kaminda e kalidat di bida dje siudadano a keda afektá i a empeorá. Pero p’esei ta e mesun siudadano aki ku tin no solamente e derechi sino tambe e deber di informá su mes di tur loke ta sosodé den su pais pasobra tur loke polítikonan hasi ta afektá nos bida diario ku nos gusta òf laga. Un pueblo informá, analítiko i aktivo ta difísil pa kai den trampa te ku ta trapa su derechinan fundamental.

 

 

 

SHARE

LEAVE A REPLY