ALEXANDRIA, VIRGINIA, MERKA, AP.- Abogadonan a bisa djamars ku a demandá gobièrnu di Merka, dor ku ta detené e muchanan inmigrante demasiado largu i ta ninga di entregá e mucha na su pariente.
Un demanda federal desde aña pasá na Virginia, a wòrdu ekstendé djabièrnè pa agregá kaso di mas di 10.000 mucha.
Simon Sandoval-Moshenberg, direktor legal di Programa Defensa di Imigrante di Legal Aid Justice Center, a bisa ku Departamento di Salú i Servisio Sosial ta hopi slou ku entrega di e muchanan na un tutor den Merka. Algun rekisito mas ku ta involukrá informashon personal di e tutornan a pone ku vários ta pèrdè interes pa yuda e menornan.
“E muchanan aki mester tin un famia, i no ta pertenesé den bodega di sentronan di detenshon di gobièrnu”, segun e komunikado.
Un bosero di HHS, ku ta supervisá kuido i detenshon di e muchanan inmigrante detené na frontera, a bisa ku e agensia no ta komentá riba kasonan andando.
HHS ta kuida di muchanan inmigrante sin kompania di un adulto na momentu ku nan wòrdu detené na frontera te na momentu ku e muchanan logra haña un famia pa biba kuné.
