LAS VEGAS, AP.- O.J. Simpson lo biba na Florida despues ku e Sali den libertat kondishonal di un prizòn na Nevada kaminda e eks strea di futbòl merikano tabata enkarselá desde nuebe aña pa un kaso di robo armá, segun indikashon di su abogado djabièrnè.
E abogado Malcom LaVergne no a spesifiká unda Simpson lo biba na Florida, ounke Tom Scotto, un amigu yega na Simpson a ofresé su kas.
“E ta bai Florida”, asina Lavergne a afirmá. “No tin duda ku e ta bai”.
Scott no a rospondé mesora na vários intento pa un reakshon.
Un bosero di Departamento Korekshonal di Florida, Ashley Cook, a indiká ku su agensia no a haña ningun solisitut di transferensia ni dokumentonan riba e kaso di Simpson.
E eks hungadó di NFL i strea di televishon ta den libertat kondishonal desde djadumingu, ounke LaVergne a señalá ku e no sa eksaktamente na ki momentu esaki lo pasa.
E ta spera di sa mas ora ku Simpson avis’é ku el a wòrdu trasladá desde e Sentro Korekshonal Lovelock na nort di Nevada. E trámitenan pa Simpson Sali liber ya a kuminsá kana, pero ainda no a wòrdu konkretá, segun e ofisial di e sistema korekshonal di Nevada, Brooke Keast.
Keast a bisa djabièrnè ku e lo no duna detaye tokante e trámitenan pa motibu di seguridat.
LaVergne a indiká ku e lo pidi splikashon si Simpson no ta liber pa 8 di òktober.
