Segun rapòrt di spesialista SDKK no ta adekuá
WILLEMSTAD.- Ayera durante tratamentu di e kaso di e akusadonan L. Y. (48) i su ruman P. Y.(46), abogado Pepie Sulvaran a bisa, ku e no tin niun klase di rèspèt pa fiskal Jansen. Segun e abogado, e ta haña ku e fiskal, no ta tratando L. humanamente, relashoná ku e problema serio ku e akusado tin ku su bista. Ámbos ruman ta será pa un kargamentu grandi di droga ku arma.
- tin un problema serio ku su wowo i segun rapòrt médiko, e ta mira solamente 20 % na un wowo i e otro 5%. Pues praktikamente e ta kedando sin su bista. Abogado Sulvaran na vários okashon, a entamá huisio sumario kontra Ministerio Públiko, pa suspendé detenshon di L. , mirando ku na su opinion, ta inhumano pa keda kuné enkarselá. Tur e biahanan ei, tantu hues den korte di apelashon, komo hues den korte di promé instansia, a rechasá e petishon, paso korte no a haña e motibunan sufisientemente bon motivá.
Segun e rapòrt ku a drenta ayera di un médiko spesialista, e instituto di
SDKK, no ta adekuá pa e akusado, relashoná ku su salú. El a bisa ku por ehèmpel e insulina ku e akusado tin ku uza, mester ta den frishidèr i no den un djùk ku eis. Esei kiermen ku e akusado mester tin un frishidèr den su sèl. Tambe e rapòrt a duna di konosé, ku e akusado su kuminda mester ta bon balansá, lokual e abogado a bisa ku esei no ta e kaso.
Abogado Sulvaran a sigui bisa mirando e situashon di Y. su salú, e mester wòrdu saká inmediatamente for di prizòn. El a bisa ku prizòn a primintí di drecha e situashon di e akusado, pero te ainda praktikamente nada no a sosodé. Entre otro e riolering, awa di wc ku no ta funshoná i kada bes ku e akusado hasi su nesesidat, e tin ku laga un hende basha awa pe. Labamentu di paña tambe no ta bai manera mester ta. E abogado a duna di konosé, ku mester tin un manera mas humano kon ta atendé ku e tipo di hendenan aki den prizòn. Segun e abogado, e fiskal ta un hulandes i e sa ku na Hulanda e trato no ta di e forma aki.
El a bisa ku L. ta komiendo aros ku galiña fo’i dia e ta detené, te ku awor i ku esaki por ta funesto pa su salú. E abogado a insistí ku su kliente no por keda mas den e situashon aki i su detenshon mester wòrdu suspendé inmediatamente. Djabièrnè awor hues lo tuma un desishon den e kaso aki.
