WASHINGTON (APF).- Un video di un hòmber di koló ku ta muriendo miéntras ku un polis di Minnesota tin rudia riba su garganta pa mas ku sinku minüt a lanta un ola nobo di furia na Merka riba trato ku polis ta duna na hendenan Afro-Merikano. T’asina ku e mayor di polis di Minneapolis, Jacob Frey, a retirá kuater ofisial di polis despues di morto di George Floyd kende tabata den detenshon djaluna komo sospechoso na suela den kayanan di Minneapolis.
“Bo rudia ta riba mi garganta, mi no por hala rosea….Mama, mama”, asina Floyd a grita. Hendenan ku tabata den bisindario i ku a presensiá e aresto a filma e insidente. Poko poko pero sigur Floyd a bin keda ketu i sin move, sin por a ni move mas miéntras ku e polisnan a orden’é pa e lanta i drenta outo. Floyd a ser hibá pa hospital kaminda el a ser deklará morto despues.
Frey a ekspresá su mes hopi rabiá, miéntras ku tabatin gritunan pa e polisnan ser husgá pa asesinato. “Loke mi a mira tabata robes den tur aspekto i na tur nivel”, asina el a bisa dje video. “Durante sinku minüt nos a opservá miéntras e polis blanku tabata primi su rudia riba garganta di un hòmber pretu”, asina Frey a deklará. “Ser pretu na Merka no mester ta un sentensia di morto”.
E abogado di derechonan sivil, Ben Crump, a deklará ku el a ser apuntá pa famianan di Floyd kende ta den edat di 40. Crump a emití un deklarashon den kual e ta splika ku Floyd lo a ser pará dor di polis pa un delito menor, kisas pa uso di kuenta bankario falsu. “E forma di uso di forsa abusivo, eksesivo i inhumano aki a kosta bida di un hòmber ku a ser detené dor di polis pa interogashon riba un kargo no-violento”.
E morto aki di Floyd a rekordá morto di Eric Garner na 2014 kende tambe a ser detené i abusá dor di polis pa benta di sigaria ilegal. Por sierto, e morto di Floyd ta bini despues di dos otro kaso di morto di personanan di koló na man di polis.
