ABVO, NAPB, Straf, SAP i SITEK a kanta akshon pa djamars

WILLEMSTAD.- Sindikatonan ku tin representashon den CGOA ta haña ku ta un falta di rèspèt di parti di gobièrnu pa informá empleadonan públiko di sierto pasonan ku ta bai tuma sin a konsultá ni informá sindikatonan di nada. P’e motibu ei nan a kanta akshon for di awor, kual ta enserá ku pa djamars awor tur empleado públiko i tambe maestronan di skol lo akudí na sede di ABVO pa un reunion informativo i pa fiha posishon.
T’asina ku ayera den oranan di atardi e sindikatonan ku ta miembro di e Komishon Sentral di Sindikatonan (CCV) a deliberá riba e karta ku Minister di Asuntunan di Personal drs. Armin Konket a dirigí na nan miembronan i a disidí for di awor ku ta kanta akshon.
Den deklarashonnan pa prensa e presidente di ABVO sr. Adrie Williams a duna di konosé ku e kos aki ta inakseptabel, pa motibu ku den e sirkulario ku gobièrnu a saka ta pone na peliger e.o. indexering, loontrede, i pago di e kompensashon di 3%. Kisas den futuro asta e pida plaka di fakansi i salarionan lo por ta den diskushon.
Teniendo kuenta ku e situashon e sindikatonan ta hasi un yamada riba nan miembronan pa djamars mainta nan registrá nan mes na sede di ABVO pa aki informá nan di e intenshonnan di gobièrnu pa kita loke tin menshoná den e sirkulario. ABVO lo no akseptá e desishon aki. Tin un indexering di 2018 ku gobièrnu mester paga sin mas pasobra esei ta algu ku a keda palabrá. Gobièrnu a bisa e tempu ei ku e tin plaka riba presupuesto pa paga indexering, pues aworakí.
Sr. Ronaldo Abraham di su parti a splika ku resientemente tabatin un GOA ekstraordinario den kual a atendé asuntunan ku ta regardá SITEK, i n’e okashon ei tin miembro ku a puntra Minister Konket kon ta para ku pago di indexering i loontrede, pero e mandatario no tabatin e desensia di informá dje desishon den konseho di minister. I ta tende sindikatonan mester a bin tende awor loke a sosodé.
Pa sindikato esaki no ta manera di trata ku representantenan di trahadó den CGOA. I den kuadro di esaki e sindikatonan (ABVO, NABP, SAP, SITEK i Straf) a tuma e lucha over i nan lo bai e lucha aki te na final.
Di su parti sr. Darius “Lio” Plantijn di SITEK a duna di konosé ku e tipo di kosnan aki ta trese dòbel konfushon serka su miembronan, pasobra nan a kaba di yega na sierto palabrashonnan ku gobièrnu. Nan no sa kiko ta di nan pakete ku a negoshá.

SHARE

LEAVE A REPLY