WILLEMSTAD – Direktiva i gerensia di ACU a tuma nota di informashon ku ta sirkulando riba retnan sosial enkuanto pago di AOV. ACU por konfirmá ku e pago di AOV lo pasa djaluna 2 di yanüari 2023, kual ta konforme lei i palabrashonnan ku SVB. Direktiva i gerensia por konfirmá alabes di no a risibí e pago di AOV for di SVB. Esaki ta tuma lugá por medio di SVB su “huisbank” djaluna 2 di yanüari 2023 parti mainta. Na momentu ku esaki wòrdu risibí, lo prosesá esakinan debidamente. Kada banko tin nan prerogativo kon nan ta atendé, prefinansiá i realisá e pagonan di nan kliente. “Nos ta lamentá un bes mas ku ta trata di trese nos organisashon den lus negativo. Nos ta spera di a informá abo komo sosio debidamente. Den 2023 tambe ACU su enfasis ta pa brinda nos sosionan un servisio eksepshonal. Nos ta konta ku boso aporte tambe pa hasi tur esaki un realidat.”
