WILLEMSTAD.- Resientemente Jeon a representá Kòrsou, durante un evento den kua adidas a promové ‘away kit’ di diferente selekshon ku ta kai bou di nan. Manera ta konosí siman pasá e marka adidas a presenta e ‘away kit’ nobo di tur e selekshonan, ku nan tra traha unifòrm p’e. Ta trata tantu di esnan ku a klasifiká pa Mundial, ku tin chèns di klasifiká ainda òf esnan ku no por klasifiká mas.Banda di e presentashon aki adidas a sòru tambe, pa por tin un evento den kua nan ta hasi promoshon pa e ‘away kit’ di tur e selekshonan ku ta kai bou di nan.
Pa yega na e persona ku lo representá kada pais, adidas mes a tuma riba su mes pa hasi e buskeda. Esaki sin nesesariamente konsultá ku federashon di kada pais. Por ehèmpel na Jamaica adidas a drenta den kontakto ku Bob Marley Foundation, kaminda huntu nan a kolaborá pa e diseño di e ‘away kit’, i alabes tambe a skohe Skip Marley, ñetu di Bob Marley, pa presente e ‘away kit’ di Jamaica. E federashon hamaikino a mira e diseñonan, pero no tabata enbolbí den e proseso pa krea esaki i tampoko pa wak ken ta presente den e evento di adidas.
Adidas a enfoká riba artista, kantante,dj, bailarin, modelo i ‘influencer’, pa kada un pais. Mirando e echo ku Jeon a krea e kantika asina popular i konosí riba retnan sosial ‘Mama Wak’, adidas a drenta den kontakto ku e artista di isla ruman Aruba pa e por representá Kòrsou. Adidas no tabatin konosementu ku e artista ta YDK si òf no.
