PHILADELPHIA.- Entrenadó di selekshon di Kòrsou, Dick Advocaat i strea ofensivo Tahith Chong, a bisa ku nan ta kla pa e duelo awe kontra Kosta Marfil. Ámbos a rekonosé ku e partido lo ta grandi, pero nan ta kere ku selekshon di Kòrsou lo duna bon bataya. Advocaat a enfatisá ku e loke e por a saka for di e wega kontra Ecuador pa esun di awe ta ku selekshon di Kòrsou por hunga ku un selekshon di nivel Mundial.
Segun Advocaat, e ekipo ta sperando un partido hopi intenso atrobe, pero e meta ta pa buska resultado. “Nos ta spera un partido fuerte awe atrobe. Nos lo hunga segun nos forsa, i purba hasi daño. Nos no ta bai defendé so nesesariamente, pasó nos mester gana”. Tahith Chong tambe a papia tokante e entusiasmo ku e selekshon a mira, despues di e empate kontra Ecuador.
E atakante a bisa ku e reakshon di pueblo di Kòrsou a sirbi komo motivashon adishonal pa e hungadónan. “Bunita mira e selebrashon i reakshon for di Kòrsou”, asina Chong a bisa. E futbolista yu di Kòrsou a rekonosé ku Kosta Marfil ta un rival di kalidat, pero el a splika ku Kòrsou mester sigui hunga bon i ta disipliná. “Kosta Marfil tin bon ekipo, nos mester traha duru, ta disipliná i ehekutá”, asina Chong a finalisá bisando.
