Ayera porfin aktividatnan a reanudá na Aeropuerto Simon Bolivar, na Caracas, for di despues di e temblor di 24 di yüni ku a laga dañonan atras na e aeropuerto.
CARACAS (AFP).- E aeropuerto internashonal, Simón Bolivar, esun mas importante di Venezuela, a reanudá su operashonnan komersial ayera despues di dañonan grave sufrí durante dje temblor den luna di yüni. E aeropuerto, ku ta sirbi Caracas, ta keda den e estado La Guaira, esun mas gòlpiá pa e temblornan di 24 di yüni. A habrié bèk “despues di hopi trabou intenso i hopi profeshonal”, segun e minister di transporte dje pais, Francisco Garcés.
Ayera mainta 10or un avion di Coviasa a lanta buelo direkshon pa Ciudad de Mexico. Un avion dje liña Global Crossing prosedente di Miami a aterisá komo mei ora despues.
Despues dje katastròf di 24 di yüni ku a kosta bida di mas ku 6.500 persona, e terminal aéreo a operá solamente pa buelonan humanitario. E pista prinsipal di aterisahe a keda parsialmente dañá pa e temblornan. Buelonan di karga a reaktivá dia 5 di ougùstùs. Operashonnan komersial a keda desviá pa otro terminalnan aéreo ku menor kapasidat den Valencia, Maracay i Barquisimeto, parti wèst di Caracas, komo tambe Barcelona, parti ost.
Segun e minister, e aeropuerto Simon Bolivar na un prinsipio ta rekuperá 25% di e operashonnan ku tabatin promé ku e temblor, pa despues oumentá pa 40% den dos luna i 60% pa fin di aña.
Despues dje temblor, Merka a apoyá outoridatnan venezolano ku asistensia tékniko i logístiko den buelonan humanitario ku a yega na e terminal. Promé ku e temblor, e aeropuerto tabata operá 112 buelo diario, ku ta 56 yegada i 56 salida.
