WASHINGTON, MERKA, AFP.- E agensia di kontròl aéreo di Merka a informá di e problemanan di personal den kasi un dosein di aeropuerto, esaki debí na e ‘shutdown’ gubernamental, ku a laga kantidat di míles di funshonario federal sin salario.
E monitòr di aviashon FlightAware a informá ku alrededor di 10 mil buelo tin retraso djaluna i djamars. Aunke no ta konsiderá ku esaki ta un kantidat inusualmente haltu, e agensia federal di aviashon FAA a atvertí ku e problemanan por bira pió.
Sekretario di transporte, Sean Duffy, a bisa na periodistanan den aeropuerto di Newark, serka di New York ku tabatin un oumento leve den e nivel nashonal di kontroladónan di tráfiko aéreo ku tabata yama pa bisa ku nan ta AO.
“Mi no ke pa e buelonan retrasá. Mi no ke pa nan kanselá, pero nos prioridat ta seguridat”, asina el a indiká. “I si nos haña mas yamada di AO, nos lo redusí e fluho di tráfiko di akuerdo ku un índise ku ta sigur pa e pueblo merikano”.
E demokratnan a vota pa e di seis bia ayera kontra di un proposishon di lei di e republikanonan pa prolongá presupuestonan.
Kontroladónan di tráfiko aéreo ta konsiderá komo empleadonan públiko esensial i nan ta sigui taha durante ‘shutdown’ di gobièrnu, aunke sin suèldu.
Un memorandum preliminar di Kas Blanku e siman akí a bisa ku e trahadónan suspendé no tin garantia di kompensashon pa nan tempu liber, loke ta nifiká ku hopi por pèrdè nan pago di forsa retroaktivo.
