KABUL, AP.- Un atake aéreo ehekutá pa forsanan enkabesá pa Merka na ost di Afganistan a provoká morto di por lo ménos sinku sivil, segun informashon di residentenan djadumingu.
E residentenan a karga e kadavernan e na Gazni, kapital di e provinsia homónimo.
Un dia promé, e presidente afgano Ashraf Ghani a pidi e pueblo pa partisipá den elekshon presidensial, apesar di violensia generalisá i e insertidumbre polítiko despues ku e negosiashon di pas entre Merka i Taliban a frakasá.
Ahmad Khan Serat, e bosero di hefe di polis di e provinsia, a bisa ku diferente persona a marcha for di distrito Khoja Omari, kargando e sinku kadavernan pa outoridat lokal den kapital di e region.
Forsa militar di Merka na Kaul a konfirmá ku e atakenan aéreo serka di Khoja Omari i Khogyani a provoká morto di 11 kombatiente di Taliban.
