Personal di seguridat di Taliban ta karga víktimanan despues ku un atake pakistaní a gòlpia un sentro di tratamentu di drogadiktonan.
KABUL, Afganistan (AFP).- Gobièrnu afgano a akusá Pakistan di a mata “hopi sivil” den un atake riba Kabul ku a alkansá “un sentro di tratamentu pa drogadiktonan”. E dos paisnan ya tin lunanan den konflikto.
Pakistan ta bisa ku su bisiña ta konta ku rebeldenan dje movementu di talibannan pakistaní (TTP) ku a realisá atakenan mortal den su teritorio. Outoridatnan afgano ta nenga esei.
Despues di peleanan den òktober ku a kousa desena di morto, e enfrentamentunan a kalma pero a reanudá ku intensidat dia 26 di febrüari despues di un ola di atake pakistaní. Islamabad dia 27 di febrüari a papia di “un guera habrí” i e mesun dia a ataká Kabul.
Ayera periodistanan di AFP a skucha vários eksploshon potente den e sentro di kapital afgano despues ku avionnan militar a bula den e área. Despues nan a konta por lo ménos 30 kadaver miéntras ku ekiponan médiko ta atendé e heridonan, ku a keda trasladá pa vários hospital.
E bosero di Ministerio di Sanidat, Sharafat Zaman, a deklará na AFP ku “tin mas ku 200 víktima mortal i mas ku 200 herido”.
Pakistan a ataká un sentro di tratamentu kontra di adikshonnan den Kabul, “matando i heridando hopi sivil, den su mayoria drogadiktonan den tratamentu”, segun e bosero di gobiernu Zabihullah Mujahid. “Nos ta kondená e krímen aki i ta kalifik’é di akto inhumano ku ta violá tur prinsipio”, segun el a agregá.
