WASHINGTON (AFP).- Gobièrnu di presidente Donald Trump a anunsiá di lo apelá un sentensia hudisial ku ta obligá pa restablesé entrada kompleto na e agensia Associated Press (AP) na White House. E prohibishon pa AP akudí na su konferensianan di prensa a surgi despues ku e medio no kier a referí na “Golf di Mexico” komo ”Golf di Merka”.
Departamento di Hustisia a bisa di lo presentá un kaso na tribunal di apelashon, un dia despues ku un hues federal a ordená White House pa restablesé e akseso na e agensia di nortisia noteamerikano, un pilar den mundu di medionan di komunikashon na Merka.
For di 11 di febrüari AP tin prohibishon pa drenta e sala di prensa di White House i tambe pa biaha den avion presidensial Air Force One, pa motibu di no ke menshoná e nomber ”Golf di Merka”, manera a keda disidí di parti di Trump.
Djamars, e wes di distrito Trevor McFadden a deklará ku e “nengamentu di akseso na AP basá riba e punto di bista” ta violá e Promé Enmienda di Konstitushon di Merka, ku ta garantisá libertat di ekspreshon i di prensa.
“Si gobièrnu ta habri su portanan pa algun periodista, sea kua sea e sitio, e no por sera porta pa otro periodistanan pa motibu di esakinan su opinion”, segun e hues.
Associated Press a selebrá e desishon aki, ku “ta konsagrá e derechi fundamental di prensa i di poblashon pa ekspresá nan mes di forma liber, sin represaya di parti di gobiernu”.
Fundá den 1846 pa korantnan di New York, AP ta sòru pa artíkulonan, potrèt i video pa numeroso medio di komunikashon, tantu na Merka komo den estranhero.
For di su regreso na poder, Trump a redusí e espasio konsedé na medionan di komunikashon grandi i a restringí akseso na organismonan di prensa, manera AFP, na fabor di representantenan di kadenanan di televishon, blogs, website i podcasts popular entre esnan ku ta identifiká nan mes komo trumpista.
