Korte di Kasashon ta obligá HOF trata kaso ku nan a rechasá:
WILLEMSTAD. – Korte di Kasashon hurisdikshon penal a duna un veredikto remarkabel ayera 11 di òktober, ora ku e tribunal ta uni su mes ku e akusado ku Korte Superior (HOF) a nenga di trata su apelashon, pa motibu ku e lo a entrega su apelashon lat. Den e kaso aki Kasashon no por uni su mes ku e forma kon e korte aki na Kòrsou a atendé ku e kaso i a ordená korte aki na Kòrsou pa trata e apelashon. Tur kos tin di aber ku informashon eróneo ku un agente di LBD ta duna e akusado ku a yega Korte pa entregá apelashon, poniendo ku e petishon no a drenta na tempu.
Ta trata di un kaso kaminda ku dia 28 di ougùstùs 2020 e akusado S.L. e dia ei 37 aña di edat a keda kondená na 3 aña kastigu di prizòn pa 6 kiebro i ladronisia. E akusado ku tabata den libertat temporal, ta kore e rísiko di bai será si e no apelá. Manera ta konosí, un akusado tin dos siman pa e entregá apelashon na “griffie”.
Den e kaso spesífiko aki e último fecha pa entregá apelashon tabata 11 di sèptèmber 2020. E akusado a bai korte pa e entregá e petishon pa apelashon, pero ta topa ku un agente polisial di LBD, ku a puntr’é kiko el a bin hasi. E akusado a splika ku el a bin korte pa e entregá su apelashon kontra di su kondena. E personal di LBD ta notifik’é ku e no por hasi esei su so i ku e mester ta kompañá pa un abogado. Esaki a pone ku e akusado S.L. ku no sa mihó, a bandoná Korte i no a entregá su apelashon.
Despues ku S.L. a aserká su abogado pa buska informashon relashoná ku su salú, pa motibu ku dia di su aresto, el a risibí un tiru for di arma di polis, ku e konsekuensia ku mester a amputá parti su brasa, el a splika e abogado ku e no por a entregá apelashon pa motibu ku e personal di LBD a splik’é tal kos.
Aki e abogado den e kaso aki mr. Blonk no a laga e fli aki subi i a entregá apelashon tòg, ounke ku ta lat. HOF den e kaso aki a nenga di trata e kaso den apelashon hustifikando ku simplemente e akusado a faya ku e periodo di dos siman pa entregá apelashon.
E desishon aki a keda apelá na Korte di Kasashon kaminda ku ayera e tribunal ta bari e ponensianan di HOF di Kòrsou for di mesa.
Nan no por komprondé kon un informashon kompletamente eróneo, esta ku e akusado mester ta kompañá pa un abogado pa e por apelá su sentensia.
Esaki a pone ku Korte di Kasashon ta manda e kaso bèk pa HOF Kòrsou trata e apelashon, pa motibu ku tur kos ta indiká ku e akusado tabata na korte dia 11 di sèptèmber 2020 pa e entregá su apelashon. Pues pronto e kaso aki ta riba ròl pa keda tratá.
