AGO no ta hasi bu ménos i VWO no ta hasi bu mas

For di chikí te grandi ta keda inspirá pa Carlluchino Gino de Windt. Su trayektoria eskolar ta hasié un inspirashon pa hopi hende. Gino a kuminsá for di skol spesial i awe e ta studiando lei na nivel HBO.

 


Di skol spesial pa HBO

Gino a konta Djasabra ku el a kuminsá na skol spesial Nelly Winkel. Di einan, ku su resultado di grupo 8 el a pasa pa AGO Juan Pablo Duarte i di einan tur kos a kuminsá Manera el a bisa. Gino a bisa ku tin diferente aspekto ku a hunga un ròl ku el a bai skol spesial, pero e no ke usa esakinan komo hustifikashon ku el a bai un skol spesial. E ta bisa ku den bida Dios tin algu pa bo, pa bo kana un ruta pa asina bo por inspirá otro hóbennan. I esei tin tras di su trayektoria.

 

Keda di focus

Na AGO el a haña e oportunidat di bai un VSBO kual ta e skol ku e kier a bai. Esaki a sosodé for di e promé trimèster pero tòg e no a sosodé. El a sali alumno di luna tur e trimèsternan pero tòg el a pasa pa VSBO. Esaki tòg no a kibra Gino pero el a sigui perseverá i den e di tres trimèster ku el a keda ku e ta bai pero tampoko nada. Pero dado momentu a yam’é ku su mayornan pa e bai VSBO. El a drenta nivel PBL. Ei tambe Gino a keda traha duru pasobra sino e por bai AGO bèk. E tabata ke ta e oportunidat pa habri porta pa otro hóbennan ku tambe a bai e nivel di AGO i ku por pasa over pa VSBO. El a tuma e oportunidat aki na serio. E tabata traha asina duru ku na PBL nan a pas’é pa PKL. El a keda traha mesun duru. Hasiendo sakrifisio i disiplina. Na momentu ku tabatin fiestanan manera karnaval Gino a keda focus pasobra e mester a keda kas siña. El a planta e simia pa kosechá den futuro. I esei a pone ku el a logra.


Sakrifisio

Despues di TKL VSBO a bis’é ku e por bai Havo, pero el a preferá pa kaba su VSBO trankil. Di einan, saliendo e mihó alumno, el a pasa pa SBO. Gino a bisa ku komo studiante bo bida ta unu di hopi sakrifisio. Ta awor e mester traha riba su fundeshi. E tin di sakrifisio awor pa despues e por gosa. “Ta sea sakrifisio awor i gosa mañan òf gosa awe i sakrifiká mañan. Esaki ta den man di abo hóben”, asina Gino a bisa Djasabra.  El a tum’é na serio i p’esei despues di SBO ku e mesun disiplina i trayektoria, sakrifisionan durante di fiestanan, traha su planning, siña na tempu i ora el a kaba su SBO i einan saliendo esun mihó, el a sigui pa nivel HBO. Gino a traha ku meta den su bida. For di ora Dios lantamentu mainta bo tin algu pa logra i den su kaso e tabata pone metanan chikí su dilanti i pa asina e yega e meta grandi., Esei tabata loke e tabata pone su dilanti, metanan chikí pa surpasá pa surpasá su mes kada dia, pa ta e mihó persona kada dia. E persona sabi ta kambia i esun ku bisa nan no ta kambia ta bezig ku akshon bobo. For di dia el a kambia su mentalidat i focus pa kosnan positivo, ta kosnan positivo so a keda pasa pe. I ounke tin biaha e tabata pasa den kosnan negativo, tòg su focus a keda pa kosnan positivo i el a keda un hóben positivo.


Studiando lei

Awor aki Gino ta den su di dos aña di lei na HBO. For di dia el a kambia su mentalidat el a disidí ku ta kosnan bon ta pasa pe. Gino no tin intenshon di bai Ulanda ainda. E ke keda Kòrsou pasobra e tin meta su dilanti. Su metanan no ta di awe pa mañan. Ta metanan for tempu e tabata na AGO. I e metanan aki ta na Kòrsou.

 

Bo mishon

E hóben ku bai AGO no tin ménos kapasidat ku otronan na nivel di por ehèmpel HAVO. Tur persona den bida tin un mishon, nan tin algu pa logra riba e mundu aki i p’esei tin persona ta bai Havo i otronan VSBO i skol spesial. Tin mas di un ruta pa yega Roma. Tin mas di un ruta pa kaba pa yega na no meta final. No ta pasobra bo a bai AGO ta hasi bu un persona ménos eksitoso  i tampoko esun ku bai VWO ta pone ku e ta bira un persona eksitoso. Simplemente tur hende den bida tin un mishon. E skol ku bo ta bai ta parti di bo mishon, pa bo kana i yega bo destino pa logra ekselensia.

 

Motivashon

Gino awor tambe ta bayendo skol pa duna charlanan di motivashon i intenshon pa e lanta un fundashon. Esaki basa riba kosnan ku el a pasa aden. El a pasa den hopi kos. El a logra hopi den e sistema ku e ta pone su focus i e ke yuda otronan, konsientisá nan pa nan logra loke e tambe a logra. Nada ta imposibel. For di kaminda el a bin i te kaminda e ta awe ta algu grandi i e ke pasa loke el a siña i eksperensia pas’é pa otro hóbennan. Na kuminsamentu di e aña eskolar aki el a kuminsá ku un proyekto kaminda el a invitá algun hóben ku ta bon bezig i hasi algu. El a hasi un proyekto di konsiensia i motivá otro hóbennan. Dor ku e focus riba diferente grupo di hóben, tin bia e por bai ku esaki òf esaya. E ta un persona ku por adaptá na tur sirkunstansia. E tin kapasidat pa pone su mes den sapatu di hopi hóben. I esaki lo sigui tuma lugá den su proyektonan i por spera mas di dje.

 

Sosten di famia

Pa loke ta su famia, Gino a bisa ku esaki ta sostené. Su mama ta unu soltero. Su mama ta esun ku a push’é pa e logra. Tabatin diferente etapa den su bida kaminda e mester a keda mas motivá ku otro, pero awor su mama ta kontentu ku e resultado ku a hinka den dje.

 

The Change Foundation Curaçao

Gino ta wak padilanti. E ta un persona ku ta pone meta su dilanti i e no por bisa spesífikamente kiko presis e lo bai focus riba dje.  E no por bisa spesífikamente kiko e lo logra aki 10 aña pasobra e no ta den su man. Gino ta bezig ku un fundashon, The Change Foundation Curaçao i e no por primintí di lo kambia hende pero e lo bai yuda e hende pa kambia i pa aki 10 aña lo logra su frutanan. E ta kere ku aki 10 aña e lo ta super stabil ku su fundashon, e lo a kaba su skol, e lo ta abogado i por spera hopi di dje. Su intenshon ta pa nifiká algu pa su pais i no gana plaka pero pa nifiká algu.

Den su último palabra el a bisa ku semper kere den bo mes. Bo ta haña persona riba bo ruta ku lo no kere den bo, pero loke abo ta mira ta esun ku Dios ke.

 

SHARE

LEAVE A REPLY