Agrupashon di Gospel T.R.U.E. ku presentashon di nan CD nobo

WILLEMSTAD.- Agrupashon di Gospel “The Real Unity Experience” T.R.U.E. a inisiá na aña 2006 ku e meta pa ministrá pa medio di diferente género musikal, pero ku énfasis riba “Ritmo Kombiná”.
E agrupashon a wòrdu fundá pa  Sharyon De Lanoi, Mernick Martha i Rodney Mambre.
T.R.U.E. ta risibí konseho i guia spiritual serka Pastor Everon Rosini i ta funshoná bou di enkargo di Clifton Hariquez komo lider di grupo, direktor musikal i kompositor.
Un di e faktornan di mas bunita di e agrupashon aki ta ku e integrantenan, músikonan i kantantenan ta bishitá diferente iglesia i tin diferente idiologia.
Komo agrupashon e banda T.R.U.E. ta representá i ke kultivá e aspekto di Unidat den Kristu.
T.R.U.E. ta toka na diferente eventonan entre otro kasamentu, hasimentu di aña, aktividatnan sosial i hopi otro eventonan.
Nada no ta limitá T.R.U.E. komo agrupashon, den alabá i glorifiká Dios, te na fin di mundu.
E aña aki e agrupashon a produsí nan CD nobo titulá “E Berdat” i lo estrená esaki djasabra 30 di mart 2019, entre 6 or pa 8 or anochi i ta ekstendé un invitashon na un i tur i ta ofresé esaki na e públiko pa nan risibí mensahenan ku lo enrikesé nan bida.
E evento ta tuma lugá na Jan Boos 110.
T.R.U.E. lo aserká radionan lokal i internashonal ku e petishon pa nan músika wòrdu toká i skucha via nan emisora pa asina e públiko por risibí enkurashamentu i un tremendo bendishon,
Meta tambe di e agrupashon ta pa motivá, enkurashá i invertí den e hubentut pa nan tambe desplegá nan talentonan den músika Kristian, i asina sirbi nos komunidat i ta parti pa haña solushon di e problemanan ku nos ta enfrentá.
Pronto e CD “E Berdat” lo ta optenibel  tambe na librerianan, iglesianan  i serka miembronan di e agrupashon.
Pa mas informashon por tuma kontakto via telefòn 525-8735 òf 675-2695.

SHARE

LEAVE A REPLY