Ainda duana ta deskriminá den kontròl na Schiphol

Hòmber yu di Korsou ta denunsiá

WILLEMSTAD.- E hòmber yu di Kòrsou, Eurleson Naar a pasa e fin di aña di mas malu den su bida despues ku el a biaha pa Hulanda promé ku Pasku 2023. Pasobra duana di Hulanda a sospech’é di a guli bolita i el a keda 8 dia será den sèl di detenshon na Schiphol pòrnada.

Den entrevista ku EXTRA Naar ta bisa ku despues ku el a baha for di avion duana a par’é i pidié pa bai sinta den un sala di espera. Einan el a ripará ku despues di dje ta personanan di koló so tabata hiba den e sala bisando nan ku nan ta sospechá di a guli bolita. Asta dos hòmber ku a pasa Schiphol di tránsito a haña di tende ku nan ta sospechoso.

Esaki pa NAAR ta klaramente un prueba ku ainda duana na Schiphol ta deskriminá den nan trabou i ta piki hende di koló so for di e pasaheronan ku ta biaha pa Hulanda for di Kòrsou. Den su kaso e ta bisa ku e personal di duana a interog’é 2 biaha puntrando kiko el a bin hasi Hulanda, akus’é ku su boka ta seku, ku p’esei e mester tin bolita, pidié pa habri su boka, bis’é ku nan a haña informashon ku e no a kome na bordo i puntra kuantu sèn e tin.

Naar semper a keda para riba su inosensia i a splika e personal di duana ku el a bai Hulanda pa biba i ku e ke hasi un estudio. El a kontesta tur nan otro preguntanan, pero apesar di esaki al final a bis’é ku e tin ku sea hasi un scan di su stoma òf bai será pa 3 dia pa asina tin sigur ku e no tin bolita.

Naar ku no ke a hasi un scan pasobra e no sa ki daño e rayonan por hasi, a bisa e personal duana ku e ta bai 3 dia será. “Ta akinan tur e problemanan a kuminsá”, Naar ta bisa.

“Loke ku e personal no ta splika adelantá ta ku mester bai af 3 biaha. Kada 8 ora 1 biaha i e shushi mester tin un sierto peso. Si no logra tin ku kuminsá di nobo.

Naar ta bisa ku e promé biaha ku el a sinti ku e mester bai af a hib’é un baño ku pòchi di wc tur shushi. “Mi a bisa nan ku mi no por asin’aki. E ora ei a hiba mi bèk mi sèl”.

Despues di esaki Naar ta bisa ku el a keda sin bai af pa 3 dia te ku el a kuminsá haña doló di barika. A yama un dòkter pe ku a bis’é pa e relahá pasobra strès a stroba e shushi di sali.

Tambe e personal di duana i Marechaussee tabata bis’é pa kome i bebe tur lokual nan dun’é i pa hasi ehersisio den su sèl. Pero kada bes ku e bai af 1 biaha bon e di dos biaha ta bis’é ku shushi ta tiki i ku mester kuminsá di nobo.

“Kada bes ku nan bisa mi esaki mi ta kai den un desesperashon. Bo ta será 23 ora den un sèl, no tin nada pa hasi ku no ta wak televishon. Tur dia ta pan so ta duna bo di kome. Ora bo tin urina nan ta bai kubo i ta kontrolá tur kos pa wak ku bo no a tira bolita afó. Ora di baña nan ta para wak bo baña, duna bo un tiki gel den bo man pa bo limpia bo kurpa kuné, hunta pasta di djente riba bo skeiru di djente p’abo, duna bo sèrbètè ora bo kaba di baña i duna bo e djòki pa bisti despues ku bo kaba di seka bo kurpa.”

Tabata e di 8 dia despues a bolbe bis’é ku su shushi tabata tiki ku un dama di Marechausee a intermediá ku su koleganan bisando ku despues di tantu dia asina e no ta probabel ku e tin bolita den su sistema, Naar ta sigui bisa. “’Ta aki nan a laga mi bai, pero mi sa di otronan ku a keda 10 dia den sèl.”

Al final ora el a bai a duna un kompensashon ekivalente na 50 euro pa dia ku el a keda detené pòrnada. Ta den e kuadro aki Naar ke konsehá tur hende ku haña nan den un situashon asin’aki pa saka un scan numa pasobra e loke bo ta pasa aden será den e sèl ta horibel.

“Ta solamente ora bo sushi ta sufisiente ta laga bo bèl bo hendenan i bo por papia máksimo 10 minüt ku nan. E kos aki ta hopi pisá mentalmente.

Na final e ta bolbe kondená e manera diskriminatorio ku ainda ta hasi kontròlnan na Schiphol riba buelonan ku ta bini di Kòrsou. Entretantu Naar a disidí di muda pa Bèlgika kaminda e ta biba aktualmente.