WILLEMSTAD – E di tres reunion tékniko pa ku reapertura di frontera entre e paisnan den Reino i Venezuela a tuma lugá dia 31 di yanüari 2023. Di akuerdo ku e deklarashon mutuo ku previamente a keda akordá dia 13 di desèmber 2022, e konsultanan a konsentrá riba e reapertura gradual di e frontera marítimo i aéreo.

Durante di e reunion tabatin oportunidat pa kada un di e paisnan presentá nan punto i proposishonnan. A diskutí ampliamente riba reanudashon di e barkunan di fruta, berdura i peska for di Venezuela pa Kòrsou kaminda entre otro a papia di interkambio di informashon di sertifikado i kondishonnan pa entrada di tripulantenan di e barkunan.

Alabes a diskutí tambe tokante un tratado di Duane entre e paisnan di Reino i Venezuela.

Den e próksimo periodo lo sigui traha riba e puntonan tékniko pa yega na un apertura sigur i gradual di e frontera.

Gobièrnu di Kòrsou lo fiha pronto un fecha konkreto pa reapertura gradual di e frontera marítimo. Lo bai sigui traha huntu tambe pa yega na un reapertura gradual aéreo. E reunion a kana den un bon esfera.

 

LAGA UN KOMENTARIO

Please enter your comment!
Please enter your name here