WILLEMSTAD – Djabièrnè 24 di desèmber 2021 alrededor di 03.12’or, Sentral di Polis a risibí yamada di un aksidente bastante grave ku a tuma lugá na e bahada di Julianabrug parti di Otrobanda bayendo direkshon di Arubastraat.

E promé unidat polisial ku a yega na e sitio, a topa un vehíkulo di bòltu riba e parti di kaminda ku ta kore di Arubastraat den direkshon di Julianabrug ku ta kondusí pa Punda.

For di investigashon preliminar realisá na e sitio a sali na kla ku shofùr di e outo aki ku tabata kore di riba brug di Punda pa bai Otrobanda, debí na ekseso di velosidat, no por a kita na man drechi i drenta e parti di kaminda ku ta kondusí pa Arubastraat. Konsekuentemente el a bai dal primeramente den e barínan di santu i seguidamente dal den un bòrchi di tráfiko.

Despues e vehíkulo a bai laira, pasa over di e vangrail i bòltu bai kai riba e otro parti di kaminda destiná pa tráfiko den direkshon kontrali.

Shofùr di e vehíkulo ku tabata keha di basta doló a keda transportá ku ambulans pa sala di Emergensia di C.M.C. miéntras e ko-okupante a fayesé na e sitio mes.

Dòkter di polis a konstatá morto di e hòmber víktima.

Debí ku famianan no a wòrdu pone na altura ainda, no por duna identidat di e víktima ku a fayesé liber ainda.

LAGA UN KOMENTARIO

Please enter your comment!
Please enter your name here