MADRID, Spaña (AFP).- E kompania spañó di aviashon, Air Europa, a disidí pa suspendé konekshon ku Venezuela, manera otro kompanianan a hasi, despues ku Merka a atvertí aviashon sivil riba un “oumento di aktividat militar” den kuadro di su presensia den Karibe.
Air Europa, ku ta operá buelonan semanal entre Madrid i Caracas, a disidí na suspendé e konekshonnan aki “te ora ku e kondishonnan ta permití pa bolbe bula” ku seguridat, segun e kompania a indiká ayera.
Fuentenan ligá na e sektor aeronóutiko na Venezuela a informá ku tur e operashonnan aéreo pa i for di Spaña lo keda suspendé te ku por lo ménos 1e di desèmber. E spañó Iberia, e portugues TAP, e kolombiano Avianca, e brasilero GOL i e chileno Latam, tambe for di djasabra último a suspendé nan buelonan. Djadumingu , Turkish Airlines a anunsiá di ta kanselá nan buelonan entre 24 i 28 di novèmber.
