NEW YORK, AP.- Airbnb a ofresé diskulpa pa lentitut di su kontesta na akusashon di wéspetnan rasista i a eksponé medidanan pa kombatí e problema, manera duna ménos prominensia na potrètnan den proseso di reserva.
Den futuro, e kompania tin plania di blòkia reservashonnan pa fecha kaminda e anfitrion a bisa ku e kas no ta disponibel.
Riba retnan sosial, anékdotanan ku hashtag “AirbnbWhileBlack” tabata wòrdu mustrá di personanan koló skur indikando ku e lugá no tabata disponibel. Despues di un par di tempu nan por a mira esaki bèk anunsiá riba e mesun fechanan ku disponibilidat pa aseptá wéspet.
“Nos a rospondé ku lentitut na e problemanan aki i nos ta lamentá esaki”, segun e kofundador i presidente di Airbnb Brian Chesky den un mensahe di blog di e empresa.
E blokeo, ku ta drenta na vigor den e promé semèster di 2017, tin e ophetivo pa impedí anfitrionnan di deskriminá wéspetnan ku un argumento falsu ku ya e propiedat ta reservá i al final hür esaki ku otro persona.
Airbnb no ta bai eliminá potrèt pa redusí e chèns pa anfitrionnan deskriminá. E kompania a bisa ku esaki ta un elemento importante di seguridat, pa anfitrionnan por identifiká klientenan na momentu ku nan presentá.
