PARIS, Fransia (AFP).- Hustisia franses ayera a deklará Air France i e fabrikante Airbus komo kulpabel di homisidio no boluntario, 17 aña despues dje aksidente di e avion ku tabata kubri e ruta Rio – Paris i ku a kosta bida di 228 persona.
Tribunal di Apelashon di Paris a pronunsiá su mes kontrario na e huesnan di promé instansia ku den 2023 a disidí na apsolvé tur dos empresa pa e tragedia di mas grandi di aviashon franses. E aksidente a drenta historia di un “katástrofe anunsiá ku por a keda evitá si kada un dje empresanan a tuma nota dje gravedat”, segun e sentensia.
Huesnan a konsiderá ku nan ta e “úniko responsabelnan” i ta imponé e multa máksimo di 225.000 euro (US$ 260.000), un kondena ku e gruponan kondená a anunsiá di lo rekurí na Korte di Kasashon franses.
E doló di famianan
Famianan dje víktimanan a tuma e sentensia na un manera dividí. Daniele Lamy, presidente di e asosiashon franses “Entraide et Solidarité AF 447”, a selebrá ku porfin “por bòltu página” i ku e tribunal a tene kuenta ku “e doló di famianan”. Pero, pa e asosiashon brasilero di famianan di víktimanan, Nelson Faria Marinho, “e desishon aki no ta trese konsuelo”, ya ku no a kondená e dirigentenan dje tempu ei. “Mi ta sinti komo si fuera ta awe mi yu a muri”, segun el a bisa na AFP.
Riba 1e di yüni di 2009, e avion ku tabata bula e buelo AF 447 entre Rio de Janeiro i Paris a kai den oranan di anochi ora ku e tabata bulando riba oséano Atlántiko, algun ora despues di a lanta buelo. Na bordo dje avion tabatin pasaheronan di 33 diferente nashonalidat.
Tribunal di Paris den aprel di 2023 a apsolvé Airbus i Air France dje akusashon di homisidio no boluntario, konsiderando ku, ounke tabatin “imprudensianan” i “negligensia”, no a demostrá “ningun relashon kasual” ku e aksidente. E kahanan pretu a konfirmá e orígen dje aksidente: e konhelashon dje sistema Pitot, ku ta midi e velosidat parti pafó dje avion, miéntras ku e tabata bula na altura haltu, den un zona meteorológiko difísil, serka di ekuador.
