Na sèptèmber awor, esta djis otro luna, e hóben DJ di 19 aña Jared Statie lo ta riba e esenario grandi di e festival Zsa Zsa Su na Amsterdam. Durante di un kompetensia kaminda por a vota online, Jay Statie a sali e ganadó i konsekuentemente e lo ta riba e esenario prinsipal di e festival dia 8 di sèptèmber.

 

Nos ta bai sera konosí un  tiki mas di aserka ku Jay Stax. Nos no a logra kit’e for di dilanti di tur su ekiponan kaminda e ta traha su melodia, pero den su zona konfortabel, ku un sonrisa te aya Jay a konta nos kon el a kuminsá.

 

“Mi ta un hóben di 19 aña di edat, trahando hopi duru ku diferente artista i diferente promotor na Kòrsou pa hasi mi soño realidat i bira e DJ number 1 di mundu”, Jay a bisa Djasabra.

 

Rumbo pa Ulanda…

Na òktober aña pasa Jay Stax a gana e kompetensia di DJ di Kòrsou pa asina e forma parti di  The Flying Dutch Curaçao. E kompetensia di DJ a tuma lugá den Club Vanilla. 5 DJ a bai e promé rònt, despues di hopi preparashon. Den kuater rònt a disidí ken ta e DJ di mas mihó.  Den e parti final a keda 2 DJ entre nan Jay Stax ku a gana e kompetensia finalmente.

I despues di a gana e elekshon Online, Jay Stax a haña e oportunidat pa representá Kòrsou den e  festival Zsa Zsa Su na Amsterdam.

 

 

DJ for di 12 aña…

Ku su 12 aña, den su kamber ku un kòmpiuter ku su tata a instalá pe i riba dje un software ku yama Virtual DJ. Asina Jay a kuminsá. For di e programa ei el a kuminsá trein. Den prinsipio el a bisa ku e kos aki no ta pe, pero ora el a wak Hardwell ku ta un di e hendenan ku e tin masha atmirashon pe na Ulanda, el a kambia di pensamentu i a bolbe purba. Tiki tiki e tabata trein i a kuminsá bai den direkshon di DJ.

 

Músika, deporte i skol…

Jay a sali di un famia músiko. I komo tal el a siña Kitara, Mandolin, Kuarta, Piano i un tiki drùm. El a bai lès di muzik i banda di dje e tabata hasi basketbòl i karate. Aktualmente Jay Stax ta bayendo CDC pero e ke DJ full full. E ta studiante merkadeo i relashonnan públiko na CDC.

 

 


Servisio ta konta…

Siendo un DJ na Kòrsou pa Jared e ta hopi fásil. E ta sòru duna e servisio ku e hende meresé i semper e ta sòru pa ta su mihó toka. Pa yega na su músika e ta kuminsá ku melodia. Asina idea drenta su kabes e ta bai tras di laptop òf ora e tende otro artistanan e ta haña inspirashon. Ya kaba Jay a traha ku diferente artista grandi na Kòrsou manera Ori, Zyon di Aruba, e ta besig ku Ata Niro di Aruba i “mi tin algun kos ku artistanan di afó, artistanan grandi ku ainda mi no por menshoná”, Jay a bisa nos.

 

Si mira e akohida ku nan komo DJ ta haña aki na Kòrsou, Jay ta kere ku esaki por ta aun mas mihó. Komo ehèmpel el a bisa ku bo no ta haña un festival ku ta dediká na DJ so. Hopi evento ta di artistanan di afó i Kòrsou i e DJ solamente ta habri e evento. I p’esei Jay ta hopi entusiasmá ku e evento ku e ta bai toka na Ulanda esta Zsa Zsa Su ku ta dediká solamente na DJ nan.

 

Den studio ku artistanan di Ulanda….

Jay lo no ta na Ulanda pa solamente e evento di Zsa Zsa Su. E tin algun evento mas pendiente ku ta praktikamente kla i ku pronto nan lo keda promoshona. E lo bishita diferente siudat i e lo drenta studio ku diferente artista grandi di Ulanda. Ainda Jay no por menshoná e nòmbernan, pero ta algu grandi e tin na kaminda.

 

Reggaeton….

E melodia ku mas Jay ta gusta aktualmente ta e reggaeton i latin. Unda ku e bai e ta tende reggaeton. I Jay a laga nos skucha algu di su melodia ku mas e ta gusta. Un ritmo manera e mes a yam’e latino,  un beat ku ta sòru pa tur hende ta riba pia. E melodia ku el a laga nos skucha el a yam’e Faruko/Daddy Yankee pasobra ta e promé artista ku a bin den su mente ora e tabata hinkando e melodia den otro.

 

Señorita i Bai….

Jay tin kantikanan na radio, entre otro Señorita ku el a saka aña huntu ku  Zyon i Gettamilli. E kansion e ta riba radio, i tambe riba e plataformanan manera You Tube, Spottify, Apple.  I luna pasa el a saka un kansion huntu ku Ori ku yama Bai ku tambe ta tur kaminda. Loke si Jay no ta hasi, ta kanta, ounke e ta sali for di un famia musikante.

 

Jay tin diferente presentashon na Kòrsou. Praktikamente tur siman e ta den Club Vanilla, e ta na Cabana, e ta toka diferente kasamentu i resepshonnan di empresanan grandi. “MI a siña di mi mama, tata i mi oma/opa, ku mi tin di hasi loke ta hasi mi kontentu. I nan a ripara ku músika ta hasi mi kontentu i nan ta sostené mi den tur loke mi ta hasi di muzik”, Jay a enfatisá.

 

Segun el a sigui bisa, ora e kaba su skol na Kòrsou e lo ke bai Ulanda i einan ounke e ta sigui den su músika i DJ e ke sigui studia den algu ku tin di aber ku evento.

 

 

Aki 10 aña….

I aki 10 aña segun Jay a bisa Djasabra, e lo ta riba e stagenan di mas grandi na mundu, sigur Tomorrowland, Ultra Music Festival i ta spera ku un dia e lo bin Kòrsou i pone su propio konsierto ku ta di DJ i artistanan di Kòrsou. E ser DJ ta su trabou prinsipal.

 

Promé ku el a yega na e nòmber di Jay Stax e tabatin 2 otro nòmber di DJ, El a kuminsá ku DJ JS, despues Jared i den kombersashon ku un primu bon konosí den eventonan, e mester a buska un nòmber ku ta dal duru ora e ta riba stage i asina el a yega na Jay Stax. E nòmber aki e tin 3 nòmber kuné, for di su 16 aña e ta Jay Stax.

 

Henter un tim lo bai Ulanda….

Su promé biaha ku el a subi stage grandi tabata na Boneiru, un festival i di einan e ta toka diferente festival di Urban. I esaki ta nifiká tambe ku e ta kla pa e festival Zsa Zsa Su na Ulanda. Ta un tim grandi e ta biaha kuné pa Ulanda. Hende pa saka potrèt, filma i naturalmente e lo subi Ulanda ku tur su produktonan di promoshon Jay Stax.

 

Jay Stax ta invitá….

Jay Stax “Mi kier a invitá bosnan tur pa bin sostené mi, bin mustra bosnan amor. Laga nos wak kuantu bon yu di Kòrsou nos ta i no solamente yu di Kòrsou pero tur boneriano, rubiano, bin pasa un dushi tempu na Zsa Zsa Su dia 8 di sèptèmber. Tambe lo mi toka sigur na Eindhoven Ulanda i ta intenshon pa pasa mas di e siudatnan pa asina por komplasé fanatikonan’.

 

 

 

 

LAGA UN KOMENTARIO

Please enter your comment!
Please enter your name here