WILLEMSTAD.- Djárason anochi a drenta e notisia tristu ku akountent di Kòrsou Rolf Verdaasdonk a pèrdè su bida na e isla di Tenerife Spaña. Esaki ta loke EXTRA a komprondé for di informenan publiká den prensa na Spaña i ta menshoná aki di un asesinato.
E krímen a tuma lugá djárason anochi mitar di 8 na Golf del Sur, un lugá popular pa amantenan di gòlf na parti sùit di e isla esei segun prensa spañó.
Segun prensa na Spaña, Rolf Verdaasdonk a keda hinka diferente bia pa su yu hòmber di 29 aña. E motibu presis prensa spañó no ta menshoná pero ta papia si ku e tata tabata enbuska di e yu, kende tabata studia na Ulanda pero tabatin algun luna kaba ku no tin komunikashon ku su famia.
Despues di basta buska i kaminda mester a pidi asta asistensia di outoridatnan internashonal, a logra haña paradero di e yu hòmber na Spaña. Djárason anochi e mayornan buskando e yu a bin topa kuné.
Pa un ke otro motibu e yu a kore tras di e mama i e tata ku kuchú. E yu hòmber a logra haña e tata Rolf i a hink’é vários bia rònt su kurpa. Polis a detené yu Hòmber i segun prensa spañó, outoridatnan ta kalifiká e kaso komo asesinato.
EXTRA ta manda palabranan di kondolensia na famia Verdaasdonk.
