OM: “Komo parti di un investigashon den kuadro di e Ordenansa di Arma di Kandela i òrdu di listramentu preventivo, nuebe (9) persona a keda detené awe, 29 di yanüari 2026. Tambe a konfiská vários arma di kandela, munishon, patronchi i lachi. Debí na e investigashon, Ministerio Públiko no por duna mas informashon na e momentunan aki.”
WILLEMSTAD.- Vários tim speshal di Polis di Kòrsou awe mainta a realisá entrada hudisial i a detené un total di 9 detenshon; 8 hende hòmber i 1 hende muhé. Tin 4 arma konfiská den e kaso aki i tambe vários munishon. Esaki bosero di polis Imro Zwerwer ta konfirmá.
Den oranan di mardugá Tim di Aresto a hasi investigashon i detenshon na trùk di pan riba Rooseveltweg. Esaki tin di aber ku un investigashon ku Divishon Anti Krímen Organisá ta hasiendo.
Despues di esaki a tene vários entrada hudisial den área di Sta Maria i a tene entrada hudisial na kas di konosido pelotero tambe relashoná ku e investigashon aki. Kuerpo Polisial awe durante e dia lo duna mas informashon ofisial relashoná ku e investigashon.
Durante investigashon polis a konfiská kantidat grandi di munishon patras di un trùk di pan den área di Rooseveltweg. Tin indikashon ku durante di e entrada hudisial den oranan di anochi un persona lo a purba deshasí di esaki nan tirando nan den mondi. Tambe tin indikashon ku e kaso tin di aber ku diferente tiramentu riba kasnan ku a tuma lugá den e último siman na Kòrsou.
