ORANJESTAD.- Kuerpo Polisial di Aruba, den kolaborashon ku Ministerio Públiko a anunsiá ku nan ta kuminsá ku akshon nashonal pa ‘entrega bo arma di kandela ilegal’. Esaki ta un akshon interinsular. Na Kòrsou ya kaba tin 2 siman ku e akshon aki a kuminsá, despues di e akuerdo entre kolegio di hefenan di kuerpo polisial.
E inisiativa aki ta un kolaborashon di e organisashonnan di Caribe Hulandes ku koperashon di Ministerionan Públiko di Aruba, Kòrsou, Boneiru, Saba, Sint Eustatius y Sint Maarten.
Kuerpo Polisial Aruba y Ministerio Públiko kier enfatisá ku e uzo di arma di kandela ilegal ta hiba na insidentenan serio. Poseshon di arma di kandela ilegal ta trese un sentimentu di insiguridat den komunidat. E ta hiba na mas violensia y mas insiguridat.
Pa lei, si gara un hende ku un arma di kandela ilegal, ta deten’é pendiente su sentensia pa un wes. Tin hende ta haña kastigu di algun aña di prisòn djis pa poseshon di arma. Sinembargo, por sosodé ku e persona ku tin un arma di kandela ilegal no kier esaki mas, pero no kier entrega esaki na polis tampoko pa miedu di keda detené.
Pa e motibu aki ta tene un akshon pa entrega bo arma di kandela ilegal. E akshon ta kuminsá for di 24 mart 2026 te ku 24 aprel 2026 na unda lo por hasi uzo di e kònteiner blou pariba di brùg. E kònteiner blou lo ta esun situá banda di warda di polis San Nicolas. Pa loke ta trata pabou di brùg lo anunsiá e lugá den e próksimo dianan.
Lo No persiguí personanan ku entrega un arma di kandela ilegal penalmente den e periodo aki. Tambe bo ta keda anónimo. E ta konta tambe pa balanan y piesanan di arma di kandela. Esakinan tambe por keda entrega.
Si polis gara un hende ku arma di kandela despues di e periodo menshoná, esei lo tin konsekuensia serio. Kuerpo Polisial Aruba ta pidi pa entrega e arma di kandela ilegal òf e piesanan paketá, pa evitá aksidente.
Hasi e desishon korekto. Entreg’é òf Nos ta bin busk’é. !
