LISBOA, Portugal (AFP).- E salimentu for di ‘rail’ di un tram ku ta rekoré un dje barionan mas turístiko di Lisboa a okashoná 15 morto i 18 herido, di kua sinku den estado grave. Tur e víktimanan a keda saká for di e loke a sobra dje tram, segun Tiago Augusto, responsabel di servisio di urgensia médiko, kende a bisa ku entre esnan afektá ta figurá algun stranhero.
E presidente portugues, Marcelo Rebelo de Sousa, a lamentá e aksidente “profundamente”. Gobièrnu a dekretá un dia di luto nashonal.
E aksidente, di kua te ayera tardi no tabata sa e detayenan, a tuma lugá 18:05 ora di Portugal serka dje karetera di La Libertad, ora ku e wagòn dje famoso tram Gloria, ku ta konektá e plasa di Rossio ku e barionan Alto i Principe Real, a sali for di ‘rail’. “Ta un tragedia ku nunka promé a tuma lugá den nos siudat”, segun e alkalde di Lisboa, Carlos Moedas.
E tram, ku kapasidat pa kuarenta pasahero, ta un medio di transporte hopi gustá pa kantidat di turista ku ta bishitá e kapital portugues. Un testigu dje aksidente a deklará di a mira kon e vehíkulo “koriendo duru” a sali for di ‘rail’ i a bai dal kontra di un edifisio. “El a dal ku hopi forsa kontra di e edifisio i a kai den otro manera un kaha di karton… e no tabatin brek”, segun e testigu.
Segun e wèpsait di Monumentonan Nashonal, e tram a keda konstruí pa e ingeniero franko-portugues Raoul Mesnier du Ponsard, inougurá den 1885. El a keda poné riba sistema di koriente den 1905 i kada kuater aña ta pasa den un proseso di mantenshon general.
