WILLEMSTAD – Un aksidente di tráfiko bastante partikular a tuma lugá den oranan di ayera anochi den bisindario di Skalo. Un shofùr a pèrdè kontrol di su vehíkulo i a terminá ta dal un otro outo ku tabata kore riba un kaya den otro direkshon. Segun informashon ku EXTRA a risibí, e shofùr tabata manehando riba Abraham Mendez Chumaceiro Boulevard den direkshon pa bai subi brùg Juliana. Net den e bògt promé banda di The Movies pa motibu ainda deskonosí, e shofùr a pèrdè kontrol di su vehíkulo. Su outo a subi riba asera krusa pasa riba un kaya i sigui su trayekto i a terminá dal den un otro outo ku na e momentu ei tabata manehando riba e kaya ku ta baha banda di The Movies den direkshon di Plasa Mundo Merced. Debí na e manera ku e aksidente a sosodé, daño material na e vehíkulonan tabata konsiderabel. Ambulans a presentá rápidamente na e sitio pa asistí e personanan envolví den e aksidente. Personal di ambulans a atendé nan na e sitio mes. Afortunadamente, niun di e personanan envolví no tabatin mester di ser transportá pa hospital. Te na e momentu aki no ta konosí kiko eksaktamente a pone e shofùr pèrdè kontrol di su vehíkulo.
