CARACAS (AFP).- E aktivista hispano venezolano Rocío San Miguel a anunsiá di “a sali liber” na Venezuela na final di un proseso hudisial pa un supuesto kòmplòt pa asesiná e eks-presidente Nicolas Maduro. Abogado, eksperto riba asuntunan militar i aktivista di derechinan humano, San Miguel a keda detené den febrüari di 2024 na e aeropuerto Maiquetia, akusá di ta envolví den un supuesto konspirashon pa mata e presidente Maduro. Su defensa semper a nenga e akusashon.
Den yanüari último e por a sali for di prizòn, pero bou di kòntròl hudisial, komo parti di un proseso di e presidente interino Delcy Rodriguez pa kontrinkantenan di eks-presidente Maduro por a bandoná prizòn.
Despues ku el a sali liber, outoridatnan di forma dirèkt a hib’é aeropuerto pa e subi avion i bai Spaña, kaminda el a keda ta na su regreso na mei último pa por a sigui ku e kaso.
Tribunal “a dikta ku no tin prueba, deklarando mi liber di responsabilidat penal pa loke ta e akusashonnan kontra di mi persona”, segun San Miguel a duna di konosé. Su eks-kasá, e koronel retirá Alejandro José Gonzalez, kapturá pa mesun kaso, a keda apsolvé huntu ku dos otro akusado.
Miéntras tantu, Ministerio Públiko a informá ku 10 otro persona si a risibí kondena “despues ku a proba nan partisipashon den loke nan a hasi”, segun e fiskal Larry Devoe. Su predesesor, Tarek William Saab, a emití mas ku 30 òrdu di aresto den 2024 pa e kaso denominá komo “Brazalete blanco”.
San Miguel a keda akusá pa delitonan di traishon, terorismo i konspirashon. Despues di su detenshon, agentenan militar a listra den su kas i a konfiská un IPad i mapanan bieu di “zonanan di seguridat” ku e aktivista tabata usa tempu ku e tabata duna lès na institutonan militar, pero a usa esakinan den e akusashon kontra di su persona.
