E aktivista polítiko konservador i YouTuber Charlie Kirk, kende a keda asesiná ayera. E tabata un fanátiko ferviente di Donald Trump.
LOS ANGELES, USA (AFP).- E hóben aktivista di derecha i ‘influencer’ Charlie Kirk, un aliado ferviente di presidente Donald Trump, a muri despues di a keda heridá ayera tardi durante di un evento públiko, un insidente ku ta pone hende teme un oumento di tenshon den e esena polítiko polarisá di Merka. Kirk, di 31 aña, tabata un orado na un evento públiko den Utah Valley University, den wèst dje pais, ora ku e atake a tuma lugá. Algun ora despues dje insidente a detené un sospechoso.
Un video dje suseso a mustra Kirk ta papia bou di un tènt dilanti di míles di persona, ora ku a skucha un tiru. Den e grabashon por mira Kirk ta sak den otro riba su stul i ta tende gritunan di pániko.
“Esun grandi, inkluso legendario Charlie Kirk, ta morto”, segun Trump a skirbi riba su página Truth Social. “Ningun hende tabata komprendé òf konkistá kurason di e hubentut di Merka mihó ku Charlie. E tabata stimá i atmirá pa tur hende, spesialmente dor di ami, i awor, e no t’ei mas serka nos”.
Mundu polítiko merikano ta kondená
E universidat a bisa ku e tiroteo a tuma lugá kasi mèrdia i ku e sospechoso inisialmente a keda detené, pero vários medio di komunikashon despues a informá ku esei no tabata e kaso. “E tirunan a tuma lugá for di un edifisio na 200m di distansia dje orador”, segun ta bisa den un komunikado. “E individuo a resultá heridá i su personal di seguridat inmediatamente a bai kuné”, segun a bisa mas aleu.
E èks vise-presidente, Kamala Harris, a kondená e tiroteo kontra di Kirk, miéntras ku polítikonan di tur organisashon polítiko a ekspresá nan indignashon pa e atake. “No tin espasio pa violensia polítiko na Merka. “Mi ta kondená e suseso i nos tur mester traha huntu pa garantisá ku esaki no ta kondusí na mas violensia”, segun Harris, kende tabata vise presidente demokrat durante e gobièrnu di Joe Biden.
Kirk tabatin un gran influensia polítiko i a kontribuí na e oumento dje apoyo pa Trump serka votadónan mas hóben, un dje faktornan klave den regreso dje republikano den White House. El a usa su enorme oudiensia den Instagram i YouTube pa generá apoyo na e polítika anti inmigratorio, na su kristianismo habrí i e krítikanan kontra esnan ku tabata provoká protestanan den vários evento universitario.
