HONG KONG, AP.- Míles a marcha djadumingu pa eksihí mas libertat durante e di 7 wikènt konsekutivo na Hong Kong.
E manifestantenan a pidi pa realisá un investigashon independiente tokante e táktikanan di polis kontra protestanan anterior.
Polis a tira gas lakrimogeno pa purba plama e manifestantenan. Promé ku esaki, e agentenan a hisa banderanan pretu komo un señal di atvertensia na e manifestantenan.
E manifestantenan a tira webu kontra edifisio di Ofisina di Enlase, kual ta representá e gobièrnu sentral den e siudat.
E protestanan grandi a kuminsá luna pasa, pa denunsia un reforma di ekstradishon ku ta permití pa residentenan di Hong Kong wòrdu huzga na China. Oponentenan indiká ku e derechi di e personanan aki lo keda komprometé ku e medida aki.
E lider di e gobièrnu lokal, Carrie Lam, a deskartá e inisiativa, pero algun manifestante ta eksihí pa e bandoná su puesto.
Hong Kong, un eks kolonia britániko, a keda debolbé na China na aña 1997. E pais a primintí ku e isla lo konserva sierto libertat demokrátiko segun e konsepto “un pais, dos sistema”.
E manifestantenan a ninga òrdu di polis pa pone fin na e marcha riba un kaminda na Wan Chai, segun polis i Frente Sivil di Derechi Humano, organisadó di e protesta.
