Sekretario di seguridat norteamerikano Kristi Noem (meimei) i minister kolombiano di eksterior, Laura Sarabia, na momento di firma un akuerdo pa instalashon di un sistema di identifikashon biométriko na Colombia
BOGOTA (AFP).- Merka i Colombia ayera a firma un akuerdo di koperashon pa frena e migrashon iregular i kombatí i krímen organisá. Esaki a tuma lugá durante un bishita ofisial na Bogotá di e sekretaria di seguridat norteamerikano, Kristi Noem.
Ta e promé reunion di altu funshonarionan norteamerikano i kolombiano for di despues dje disputa diplomátiko riba belasting entre e dos gobièrnunan den yanüari.
E presidente kolombiano, Gustavo Petro, e tempu ei a rechasá un buelo militar di Merka ku kolombianonan deportá miéntras ku el a denunsiá maltrato na su siudadanonan. Komo reakshon na esaki, Donald Trump a menasá ku imponé belasting, loke a eskalá e krísis.
Kristi Noem i e kansier kolombiana, Laura Sarabia, a firma un deklarashon di intenshon pa instalá sistemanan di identifikashon biométriko den e pais suramerikano.
“E meta dje kombenio ta “pa yuda e pueblo kolombiano pa detektá i impedí ku kriminal- i teroristanan ta purba krusa nan fronteranan”, segun e funshonario norteamerikano den un konferensia di prensa.
Djárason último, Noem a inisiá un gira den Latinoamérika kuminsando na El Salvador. El a bishitá e prizòn di máksimo seguridat kaminda tin 200 venezolano kendenan a keda deportá for di Merka.
