WILLEMSTAD – Ayera, djaweps 18 di febrüari 2021, Gobièrnu di Kòrsou a firma un akuerdo ku Dutch Antilles Ballpark Academy Foundashon (DABA) pa desaroyá e vèlt pabou di Sabana Ballpark. Ta trata di e vèlt den e hanchi dilanti di Richard ‘Chati’ Constansia, banda di Richard Elhage. Minister Croes huntu ku Minister Jesus-Leito a firma ku e astro pelotero sr. Hensley Meulens ku ta representá DABA. E akuerdo aki ta forma parti di gobièrnu su maneho pa atendé ku fasilidatnan deportivo i vèltnan, den kual ta firma akuerdo ku organisashonnan ku ta bin na remarke pa hasi esaki segun un lista di kriterio.

E akuerdo ku Hensley Meulens tin un durashon di 5 aña ku e posibilidat pa alargá esaki. A base di e akuerdo aki DABA ta bai desaroyá un proyekto fantástiko pa nos hóbennan. E ta enserá formashon di hóbennan den e deporte di beisbòl, stimulá desaroyo di beisbòl den e parti di Reino den Karibe, organisá aktividatnan di beisbòl manera clinics, seminario pa coach i training. Tambe e fundashon ta bai sòru pa diferente material nobo pa nos hóbennan por praktiká e deporte na un manera optimal. Alabes lo pone yerba artifisial, konstruí “cages”, “dugouts”, un tribuna i un kurá.

Den último simannan Minister Croes a hasi su máksimo esfuerso pa e akuerdo aki keda finalisá pa asina e proyekto por start. Di e forma aki Minister Croes ta trahando duru pa den kuadro di e maneho di gobièrnu desaroyo di deporte por tuma lugá i brinda e perspektiva deportivo na nos hóbennan.

1 COMMENT

  1. Un Danki di Kurason na Hensley Meulens!
    Please hinka den e proyekto aki tambe, oportunidat pa praktika beisbol rekreativo. Pa esnan ku ke hunga “for fun” i no kompetitivo, p.e. esnan ku un desabilidat. Esei ta hasi HOPI falta na Korsou.

LAGA UN KOMENTARIO

Please enter your comment!
Please enter your name here