Presidente interino venezolano, Delcy Rodriguez, na momentu di hiba palabra ku presensia di Sekretario di Energia di Merka, Chris Wright (r) durante akto di firmamentu di akuerdonan petrolero na Palasio Presidensial Miraflores, na Caracas.
CARACAS (AFP).- Venezuela a firma akuerdonan ku e petroleronan Chevron i ENI a amplia nan operashonnan den e pais, i ku GE Vernova pa rekuperá e industria di koriente. Tur esaki den presensia dje Sekretario di Energia norteamerikano na Caracas.
Chris Wright a partisipá den e akto huntu ku e presidente interino Delcy Rodriguez den e palasio presidensial di Miraflores, despues ku Washington i Caracas dia 28 di ougùstùs a anunsiá un akuerdo históriko relashoná ku reservanan petrolero di Venezuela.
“Mi ta kere ku e akuerdonan ku nos ta firma awe, ku míles di miónes di dòler di invershon i finalmente hopi pero hopi kupo di trabou ku ta keda kreá, ta esensial pa kuminsá trese pas, oportunidatnan i prosperidat pa tur hende”, segun e Sekretario di Energia norteamerikano.
E petrolero norteamerikano Chevron i e italiano ENI lo operá bou di un kontrakt di produkshon petrolero (CPP) ku ta oumentá nan partisipashon riba diferente tereno. Delcy Rodriguez a ekspresá su gradisimentu na e presidente Donald Trump pa “tur e esfuersonan ku su gobièrnu a desplegá” pa logra akuerdonan di “win-win”.
Gobièrnu di Venezuela mas aleu a firma kombenionan ku e empresa GE Vernova Inc., pa drecha gran parti dje ret di koriente dje pais.
“Ku e akuerdonan ku nos a firma nos lo sigui avansá pa stabilisá i pa drecha e ret di koriente pa e pueblo akí i pa esnan ku ke hasi negoshi”, segun Roger Martella, direktor korporativo di GE Vernova.
Mas aleu, gobièrnu venezolano a firma un akuerdo ku e empresa venezolano Primavera pa operashon di dos área di petroli den Orinoco kaminda tin importante reservanan di krudo.
“Pa prosperidat di Venezuela”
E Sekretario di Energia di Merka a bisa di ta spera ku e akuerdonan energétiko firmá ku Venezuela lo generá invershonnan mionario ku lo trese “pas i prosperidat” pa e pais.
Chris Wright a trese dilanti ku e rekursonan aki lo ta “fundamental pa pone na marcha e dinámika di pas, oportunidat i prosperidat pa henter Venezuela” i e kontinente.
“Esaki ta nos bisindario”, segun el a deklará durante un akto di firmamentu di kontrakt ku e multinashonalnan energétiko na Caracas.
