E hefe dje delegashon ukraino i e Minister di defensa i Ukraina, Rusten Umerov (dilanti) i miembronan dje delegashon na momento di bandoná Palacio Ciragan despues dje di dos buèlta di negoshashon entre Ukraina i Rusia na Istanbul.
ISTANBUL, Turkia (AFP).- Rusia i Ukrania ayera a yega na un akuerdo pa interkambio di prezunan di guera di ménos ku 25 aña i tambe heridonan, ademas di entrega di míles di kadaver di sòldánan. E akuerdo ei tabata durante di kòmbersashonnan na Istanbul, negosiashon ku a finalisá sin un akuerdo pa para e guera.
Mas ku tres aña despues dje invashon ruso, tur dos pais a tene un di dos buèlta di negoshashon dirèkt, e dia siguiente ku Ukrania a realisá un atake grandísimo riba suela ruso.
Den oranan di anochi, e presidente turko, Recep Tayyip Erdogan, a ekspresá su disposishon pa un kumbre “na Ankara òf Istanbul” entre e presidentenan di Merka, Ukrania i Rusia pa logra un fin dje guera. E presidente norteamerikano, Donald Trump, a bisa di ta “oké” pa biaha pa Turkia, segun su bosero Karoline Leavitt.
Durante dje reunion, den palasio di Ciragan, Rusia i Ukrania a yega na un akuerdo ku ta benefisiá e prezunan di guera gravemente heridá òf kendenan ta bou di 25 aña, segun e hefe di delegashon di Kiev, e minister di defensa ukraniano, Rustem Umerov. Ademas, tambe a akordá e entrega di 6.000 kadaver di sòldánan di kada banda, segun e fuente a agregá.
Pero ku tur esei, e reunion a finalisá sin un akuerdo pa stòp ku e guera.
“E parti ruso a sigui rechasá e proposishon pa stòp e guera di forma inkondishonal”, segun e negoshadó ukraniano, Serguii Kislitsia.
Mosku a proponé na Ukrania pa stòp ku e guera di forma parsial entre dos pa tres dia, segun e hefe negoshadó di Rusia, e asesor presidensial Vladimir Medinski, kende a deklará di no sa kuantu kadaver di sòldánan ta den man di ukranianonan.
Segun Umerov, Ukrania a proponé Rusia pa un siguiente siklo di diálogo entre 20 pa 30 di yüni.
Umerov mas aleu a duna di konosé ku e delegashonnan mester akordá un enkuentro entre e presidentenan di Ukrania, Volodimir Zelenski, i di Rusia, Vladimir Putin, un proposishon ku Kremlin ta rechasá.
