Ko akusado a bisa ku e tambe ke papia e bèrdat

WILLEMSTAD.- Korte di apelashon, ayera a trata e kaso di e asesinato kruel ku a haña e nòmber Barí, pro forma. Ta trata di e kaso kaminda e  komersiante venezolano Angel Barios Rodriguez, a keda derá bibu riba tereno di un finka na Choloma, den e periodo di 8 febrüari pa 30 di mart 2020.

Ministerio Públiko ta akusá un kantidat di 9 venezolano di ta involukrá den e kaso aki. E sospechoso prinsipal M. Ordonez (21) nasé na Venezuela ku tabata traha pe víktima, kolektando sèn pa manda Venezuela, a bin ku e plan pa likidá e hòmber, pasó e tabata deb’é mas di 13 mil florin.

Ordonez a duna deklarashonnan amplio na hustisia, ku a kondusí na detenshon di tur e otro akusadonan. Tur a haña kastigunan haltu.

Ayera Ordonez a duna di konosé, ku e ke sigui koperá ku hustisia pa trese mas klaridat den e kaso. El a bisa ku e sa unda e hòmber Maikel ku a koba e buraku pa dera e víktima ta na Venezuela. Maikel a hui bai Venezuela, despues ku polis a detené e akusadonan.

Un otro akusado tambe a bisa ayera ku e ke papia e bèrdat. Segun e akusado, e ke papia e bèrdat pa trese mas klaridat den e kaso aki. E ke papia ku polis, pero lo no bai divulgá nòmber.

E abogadonan a hasi vários deseo di investigashon, pero e tribunal a honra petishon pa skucha e akusadonan komo testigu. E tribunal di Hof a bisa, ku nan lo keda skuchá durante tratamentu di e kaso ku ta tuma lugá na luna di mart binidero.

Tur kos a kuminsá na momento ku polis a deskubrí un outo na kandela, riba Dam Pretu dia 9 di febrüari 2020. Despues di un investigashon, a resultá ku e outo tabata pertenesé na e víktima Barios.  Mas den oranan di anochi, a drenta un informashon ku e víktima a desaparesé.

Polis a skucha e señora ku ta traha na kas di e víktima, ku a deklará ku e último bia el a tende Barios tabata diskutí  na telefòn ku su trahadó Ordonez over di pagamentu.

Ora e  víktima a sera telefòn, el a bisa e señora ku e no tin konfiansa den Ordonez, pa motibu ku den pasado el a traha pe kaba, pero despues  a kore kuné paso el a hòrt’é.

Polis ku a kuminsá ku investigashon, a mira ku un hende a subi e kuenta bankario di e víktima e mesun un anochi ku el a disparsé.

A resultá ku Ordonez ta esun ku a subi kuenta di e víktima via di e token. Polis a tene entrada hudisial na Ordonez su kas i a haña  e token di Banko Caribe di e víktima den su poder. Esei tabata sufisiente motibu pa detené.

Na polis Ordonez a duna vários deklarashon basa riba mentira, pero despues a disidí di basha bou i bisa ku nan a sekuestrá e komersiante i tir’é den buraku bibu.

Aki el a basha bou nòmber di tur esnan ku a yud’é i asina  kondusí na tur su detenshon. El a bisa ku nan 5 a sekuestrá e komersiante, promé na su kas i bai kuné na Finka na Choloma.

Nan a obligá e víktima pa duna su number di kuenta i ora ku nan a wak, e tabatin solamente 1000 florin riba su kuenta bankario.

Esei a pone ku un di nan a bira furioso i a bisa pa tira e komersiante den e buraku tape,  pasó el a  mira nan kara. Durante tratamentu di e kaso den korte di promé instansia, tur e akusadonan a tira falta riba Ordonez.

E kaso a keda posponé i lo keda tratá na luna di mart binidero.

LAGA UN KOMENTARIO

Please enter your comment!
Please enter your name here