WILLEMSTAD.- E akusado Jundrick B. (21) ayera a presentá den sala di korte pa un atrako ku violensia ku el a kometé den union ku otronan dia 6 di desèmber 2023.
El a hasi esaki dor di blòkia e vehíkulo ku e viktima tabata aden , baha kara tapa huntu ku un otro hòmber ku arma den man atraká e señora, forsagea kuné i asina logra kita su pòtmòni i telefòn bai kuné.
Pa loke ta trata e dos echo kastigabel Jundrick ta keda akusá pa poseshon di arma.
Jundrick a keda detené fo’i 9 di yanüari último. El a bisa ayera durante tratamentu di su kaso, ku e ta sinti su mes malu, paso tur su hendenan ta rabia kuné.
Úniko kos ku el a hasi tabata kore e outo. El a bisa ku e ta aseptá su fayo. El a konta ku e dia ei doño di e outo ku ta e hòmber di inisialnan G.M. a bin wak e na kas.
Dado momento G.M. a bèl un amigu riba su telefòn.
Nan a kore bai serka e amigu i a traha e plan pa bai atraká e señora.
Segun e denunsia di señora Wilson ku a resultá e viktima, e tabata buska un outo pa kumpra. El a mira un Hyundai na benta riba retnan sosial pa 4 mil florin. El a tuma kontakto ku e persona ku lo ta bende e outo. E persona a bis’e ku e mes lo bin busk’e pa nan bai un garashi i pa e mes por wak kondishon di e outo.
Despues di a sali e garashi e hòmber a bis’e ku si e kumpra e outo fo’i dje, e señora lo tin ku bai hib’e kas.
Nan a kuminsá kore i e hòmber a bisa ku e mester bai kue gasolin. E hòmber a kore drenta diferente kaya di kual e señora a haña esaki hopi straño. Na altura di e dam di Muizenberg, direpente un vèn shinishi a kore bin riba nan , blòkia e outo i dos hòmber a bula baha fo’i dje vèn kara tapa bin den nan direkshon. Kada un tabatin un arma den man. Nan a bin riba dje i purba kita su tas sin bis’e nada.
Segun e viktima, el a kuminsá bringa ku nan ku e konsekuensia ku e arma a kai fo’i un dje hòmbernan. El a logra kue e arma fo’i djabou, pero un di e hòmbernan a logra ranka e arma bek fo’i dje.
Dor di spantu el a pidi nan pa no mat’e. Despues di nan akto nan a drenta e vèn i kore bai.
Remarkabel ta ku e hòmber ku tabata kuné den e Hyundai, a keda para riba distansia mira e otro hòmbernan bringa kuné, sin hasi nada. E na su turno a drenta bek den e Hyundai huntu ku e hòmber i puntr’e si e tin di aber ku e loke a sosodé, di kual e hòmber no a respondé. El a bis’e pa para e outo, pero e hòmber no tabata ke.
Esei a pone ku el a habri e porta di outo i bula abou.
E hòmber den e Hyundai a sigui kore bai lag’e atras. Polis a revisá e imágennan di kámara di e garashi kaminda nan a bai kuné i tambe a wak e kámaranan den e área kaminda e atrako a tuma lugá.
Durante investigashon polis a mira ku e outo ta di e hòmber G.M. E señora a rekonosé G.M. riba e imágennan di kámara.
Polis a wak den e telefòn i a haña number di Jundrick . Nan a tene entrada hudisial na su kas i a haña un telefòn den su kamber. A resultá ku e telefòn su number ta kuadra ku esun di e akusado.
Polis a logra tap kòmbersashon, a tende ku tabatin un plan pa kometé un atrako i a saka afó ku Jundrick tabata den kontakto ku G.M
Promé e akusado a bisa ku e ku un otro hòmber so tabata den e vèn di kual e tabata e shofùr.
Pero e dama viktima a deklará ku ta dos hòmber a baha ku dos arma riba dje. Ayera e akusado a atmití ku e ta esun ku tambe a baha pa kita e dama su pòtmòni. Segun e akusado ta un arma di ‘airsoft” nan tabatin. E intenshon tabata pa spanta e dama i kita su pòtmòni sin lastim’é. El a bisa ku e tin duele pa loke el a hasi i ta purba pa no hasi e kosnan aki nunka mas.
Fiskal a haña e akusashon probá , abase di e deklarashon di e akusado mes i tambe pruebanan di material. Mirando esakinan fiskal ta yega na un demanda di 4 aña di kual 1 kondishonal. Pa loke ta trata e sospechoso G.M. fiskal a bisa ku e ta sera pa un otro delito na Hulanda i manera e keda pone den libertat, e tin ku bin responsabilisá su mes pa e kaso aki.
Despues di a bai deliberá wes ta yega na un kondena di 36 luna di kual 16 kondishonal mara na 3 aña di prueba. Wes a tene kuenta ku edat di e akusado i tambe ku e tin ku kaba su skol . Banda di esaki e tin ku sigui guia di Reclassering.
