WILLEMSTAD.- Sheldry Osepa, miembro di frakshon di Partido Nashonal di Pueblo, a manda karta pa minister Cooper. Den e karta Osepa ta skirbi: “Ku preokupashon mi a tuma nota di un publikashon riba Facebook di minister di Tráfiko, Transporte i Planifikashon Urbano, señor Charles Cooper, den kua señor Cooper ta kritiká korant Èxtra mahos i tilda e korant prestigioso aki di “riool journalistiek”. Tur esaki djís pasombra Èxtra a publiká tokante e presunto plakanan bou di mesa ku èks minister plenipotensario tabata kobra un kompania di taksi. Korant Èxtra a menshoná esaki despues ku asta korte na Den Haag a skibi esaki den un vònis.”
Segun Osepa e kaso ta hopi serio si mira ku e públikashon di Èxtra ta trata akusashon fuerte di kobramentu di ‘kickback’ di 20% ora e kompania di taksi kier hasi trabou pa gobièrnu di Kòrsou. “E akusashon ta ku kada bes ku e kompania di taksi kue un kareda, e kompania mester a duna 20% bou di mesa. Apesar di e akusashon serio aki promé minister Gilmar Pisas no a rel, ni tril. Alkontrario, tur hende ku habri boka pa defendé Kòrsou, gobièrnu Pisas a tuma na malu. Awor ku korant Èxtra, komo un korant ku mas di 50 aña, ta konta loke a pasa den sala di korte na Hulanda, señor Cooper ke intimidá e korant. Pueblo di Kòrsou mester desaprobá e aktitut aki. Enbes pa minister Cooper, komo minister den gabinete Pisas, tin ripára pa e bèrguensa ku kara di Kòrsou tabata pasando na Hulanda, minister Cooper a disidí di ataká korant Èxtra den un manera masha mahos i baho. Den un demokrasia, gobièrnu no ta solamente obligá pa respetá libertat di prensa, sino tambe mester evitá ku ta intimidá prensa. E forma di atendé aki di e minister ta robes. Asina aki niun otro periodista no ta tribi di hasi nan trabou krítiko i informá pueblo debidamente. P’esei pueblo kompletu mester kondená e forma ku a trata di sera e korant su boka.”
Osepa ta hasi na minister e siguiente preguntanan:
-Minister a tuma nota di e públikashon riba Facebook di Minister di Tráfiko, Transporte i Planifikashon Urbano dirigí kontra korant Èxtra ?
-Minister por informá si gabinete Pisas ta para tras di e publikashon di minister Cooper?
-Minister ta sostené e tono, kontenido i manera ku minister di Tráfiko, Transporte i Planifikashon a dirigí su mes kontra Èxtra i tilda Èxtra di “riool journalistiek”?
-Si ta sí, minister por splika kon esaki ta kompatibel ku e deber di gobièrnu pa respetá libertat i independensia di prensa?
-Minister ta rekonosé ku Èxtra, manera tur otro medio di komunikashon na Kòrsou, tin derecho pa publiká informashon asta ora esaki ta inkomodo pa gobièrnu?
-Minister tambe ta di opinion ku e públikashon di minister di Tráfiko, Transporte i Planifikashon ta un peliger pa libertat di prensa i demokrasia na Kòrsou?
-Minister por garantisá Parlamento ku gobièrnu di Kòrsou no ta intimidá periodistanan, preshoná òf stroba periodista òf medio di komunikashon pa publiká informashon krítiko tokante gobièrnu òf un miembro di gobièrnu?
-Minister por manda un deklarashon Parlamento den kual gobièrnu Pisas ta sigurá Parlamento ku prensa na Kòrsou tin derecho pa investigá, publiká i kritiká gobièrnu sin miedu pa represaya, intimidashon òf preshon?
-Minister ta dispuesto pa tuma kontakto ku korant Èxtra i pidi despensa pa e forma fastioso ku a trata e korant prestigioso aki?
