KRALENDIJK – “Den RCN ta krea i inventá vakatura pa duna kompinchi trabou”, un empleado di asuntunan di labor ta bisa. E ta preferá di keda anónimo pa evitá represaya. Segun e fuente digno di krédito aki, a bira kasi komun ku ta krea vakatura aunke no tin un pedido pa labor. “Bo ta mira ku ta krea funshonnan di liderato i hopi bia un Hulandes Oropeo ta haña trabou sin ni ta kalifiká pa esaki”, e ta amplia. Un situashon ku sigur ta eksigí atenshon i BONERIANO a profundisá den e situashon di vakatura fantasma aki.

 

Chèns igual

BONERIANO a tuma kontakto ku e unidat di RCN di Asuntunan Sosial i Empleo (SZW) pa un aklarashon. E bosero di e unidat aki, a aserká diferente departamento di RCN pa konhuntamente trese un reakshon. Nan ta desmentí kategorikamente e akusashon aki. “Nos no ta traha vakatura pa niun hende. Ora tin trabou nos ta buska forsa laboral”, e bosero ta splika.

Segun e bosero aki, e meta pa saka un vakatura nunka por ta asina pa trese Hulandes Oropeonan na Boneiru. “E meta ta pa haña un persona ku por ‘yena’ e funshon bon. Na momentu ku tin mas ku un persona ku ta kalifiká semper lo duna preferensia na un kandidato den region”, e ta agregá.

 

Regla

Nos a komprondé ku RCN tin un prosedura standart pa yena vakaturanan. Promé, nan ta saka e vakatura interno i despues ta publik’é eksterno.

Aparentemente RCN tin un komishon di vakatura. Ta krea e komishon aki a base di e vakatura konserní. E komishon ta konsistí di hefe di e departamento, spesialista di kontenido di e departamento en kuestion ku ta haña sosten di un konsehero di Rekursonan Humano. Nan ta hasi e promé ròndu di kombersashon i hopi bia tin un segundo kombersashon. Den e kaso aki ta kambia algun miembro di e komishon pa otro kolaboradónan di e unidat.

 

Desviá

Apesar di e prosedura aki riba deskribí sa sosedé ku RCN ta desviá di reglanan. Esaki a pasa ku e dama M.H. “Mi a traha promé via ‘uitzendburo pa SZW. Despues nan a krea un funshon komo kolaboradó di ‘staf’ spesialmente pa mi”, e ta bisa. Segun e persona aki a palabrá adelantá ku e funshon lo ta p’e aunke mas hende solisitá. Despues ku a publiká e vakatura riba intranèt di RCN, no tene un kombersashon di solisitut kuné. “E hefe suplente a bisa mi ku mi ta e úniko kandidato pues lo no tene un kombersashon di solisitut ku mi.”

E hefe di SZW, Eric Brakke, ta atmití ku den e kaso di e dama aki a desviá di e prosedura. “Mi a pidi pèrmit na Konseho di Partisipashon i nan a aprobá pa mi por desviá. Esaki tabata e motibu ku e situashon di e dama aki a kana diferente. Tin bia kos mester bai di e manera aki. Esaki tin mag”, e ta bisa.

Segun bosero di SZW esaki ta komprendibel. “Durante e periodo di sosten di corona a surgi èkstra trabou ku niun hende a premirá. Pues nos tabatin mester di hende ku e abilidat nesesario i por a traha di inmediato. Nos a tuma diferente persona via ‘uitzendbureau’”, e ta agregá.

 

Profil i abilidat

Tin hopi atenshon pa personanan lokal haña trabou na Hulanda Karibense i no presisamente Oropeo. “Si bo wak rònt, bo ta ripará ku tin hopi persona lokal den funshonnan ehekutivo”, Brakke ta splika. Tambe ta un echo ku tin basta hefenan ku ta Hulandes Oropeo i no lokal. Segun Brakke mester tene kuenta ku profil di un hefe di departamento. “ Meskos ku ta spera ku Hulanda sa loke mester aki, un hefe di departamento  mester sa kon ta tuma desishon na Hulanda. Ami sa kon e sekretario di estado ta tuma desishon i balansá situashon. M’a presensia diferente debate na Den Haag. E realidat ta ku ta difísil pa haña un persona lokal ku e profil aki”, e ta splika.

Segun bosero di SZW, RCN ta hasiendo basta esfuerso pa krea hefenan lokal. “Nos ta ofresé diferente kurso i nos ta traha huntu ku TOP Bonaire. Apesar di tur e esfuersonan aki, ta keda difísil pa haña òf forma kandidatonan lokal pa funshonnan mas spesialisá.”

 

 

 

 

 

LAGA UN KOMENTARIO

Please enter your comment!
Please enter your name here