TIRANA, ALABNIA, AP.- E operashon di búskeda i reskate di sobrebibiente di e temblor ku a sakudí Albania siman pasá a terminá, segun anunsio di e promé minister. E kantidat di persona ku a muri a oumentá na 50 i a bisa ku no ta kere ku tin mas kadaver entre e kantidat di ruina ku e temblor a kousa.
Segun sifra preliminar, mas di 1.465 edifisio den e kapital, Tirana, i 900 den lokalidat Durres a sufri daño komo konsekuensia di e temblor di magnitut 6,4 registrá djamars mardugá, segun splikashon di Edi Rama.
Alrededor di 2.000 persona a resultá heridá i un muhé ainda ta den koma, segun informashon di funshonarionan médiko.
Datonan preliminar ta kalkulá ku por lo ménos 4.000 persona a pèrdè nan kas. Si esaki, 2.500 a kedando den hotèl miéntras ku e otro parti a keda transportá pa Kosovo na ost di Albania.
E promé minister a primintí ku tur persona afektá lo haña un kas firme pa biba aden pa final di 2020.
Ekspertonan di Gresia, Fransia, Italia, Hungria, Bulgaria, Lituania i Letonia ta partisipando den evaluashon di e edifisionan.
Un proyekto nobo di lei lo proponé kondena di te ku 15 aña di prizòn pa tur invershonista, arkitekto i supervisor ku no kumpli ku normanan di konstrukshon. Outoridat ta kulpa esaki i korupshon kresiente den e industria di konstrukshon albanes pa gran parti di e dañonan ku e temblor a laga atras.
