WILLEMSTAD.- Famianan e siman aki ta tuma despedida di un dje habitantenan di mas edat di Kòrsou, Alejandrina de Jesus van Lamoen-Vargas, kende dia 14 di mei a fayesé na edat di 103 aña. Remarkabel dje defuntu aki ta e echo ku na edat di nobentisinku aña el a keda riba pia apesar di un pulmonia i te hasta na prinsipio dje aña’ki a rekuperá despues di a keda infektá ku covid. Pero un atake selebral ku el a sufri algun siman pasá a resultá di mas.

Alejandrina, konosí komo “Mamai” pa un i tur, a nase na Puerto Cumarebo, Venezuela, riba 2 di yanüari 1919. Na edat di 12 aña el a imigrá pa Kòrsou pa despues kasa ku Frederik Alexander van Lamoen. E pareha a haña 7 yu, tres mucha muhé i kuater yu hòmber.

E famia a lanta den Mundu Nobo, despues sigui pa Marchena, Ser’i Pietermaai, Maripampun pa finalmente Mamai a muda pa Brievengat Nobo, kaminda el a bai biba serka un yu muhé.

Su yu Viola Elisa – van Lamoen ta deskribí su mama komo un persona ku a hiba un bida trankil, no sa rabia i tabata stimá pa un i tur pa su manera di trata kada hende ku yega serka su persona. “Mamai tabata konosí pa un hende ku gusta kompartí”. Te ku promé di a sufri atake siman pasá, e tabatin un memoria inkreibel kòrdando tur hende na nòmber, fecha di nasementu i por a hiba kombersashon rekordando delaster un kos di dékadanan pasá.

Remarkabel ku te dos siman pasá su kachó Boxie no tabata permití pa ningun hende aserká su persona. Pero una bes ku su doño no a baha mas for di kama, e tabata laga tur hende yega serka su doño.

Entiero di Alejandrina de Jesus van Lamoen-Vargas ta djaweps 19 di mei, mainta 9 or na El Tributo Otrobanda.

2 COMMENTS

  1. Famia van Lamoen i demas famianan. Kondoleer i firsa ku e perdida grandi aki. Ku lus eterna lusa pa semper pa Mamai.🌺🙏🏻

LAGA UN KOMENTARIO

Please enter your comment!
Please enter your name here