KIEV, UKRANIA, AFP.- E minister di Eksterior aleman, Annalena Baerbock, a afirmá djaluna na Kiev ku Alemania lo hasi tur kos posibel pa garantisá seguridat di Ukrania, reiterando su deseo pa tene un “kombersashon serio” ku Rusia.
“Nos lo hasi tur kos posibel pa garantisá seguridat di Ukrania i Europa”, segun e hefe di diplomasia den un rueda di prensa huntu ku e funshonario di Ukrania, Dmytro Kuleba.
“Nos ta dispuesto na inisiá un kombersashon serio ku Rusia”, asina el a añadí, ku e intenshon di resolvé e situashon aktual, kual el a bisa ku ta “ekstremadamente peligroso”.
Kuleba a bisa ku el a papia tokante entrega di arma pa Ukrania, despues ku Kiev a akusá Berlin di impedí yegada di armanan di defensa di un koperashon ku NATO.
Ukrania ta bibando den un konflikto ku separatistanan pro ruso desde 2014, ku a laga mas di 13.000 morto i ku a kuminsá despues ku Moscow a aneksá na e península di Crimea.
