Momento ku e siman akí Alexander Dobrindt a presta huramentu komo minister den e gabinete aleman nobo.
BERLIN, Alemania (AFP).- E minister aleman nobo di Interior a anunsiá di a duna instrukshon na polis di frontera pa ekspulsá e solisitantenan pa asilo i kendenan no tin papel, “ku eksepshon di gruponan vulnerabel manera muchanan òf muhénan na estado”.
E meta dje medida akí ta pa “redusí e migrashon klandestino”, segun Alexander Dobrindt, algun ora despues di asumí e funshon.
Pa apliká e desishon akí, Dobrindt a anulá un desishon di un di su predesesornan, di 2015 i emití´den pleno krísis migratorio. Alemania e tempu ei a aseptá mas di un mion refugiado prosedente di prinsipalmente Siria i Afganistan.
Den e tempu ei, e minister a pidi polis federal “pa outorisá e entrada di siudadanonan di otro paisnan sin dokumento ku ta legitimá nan estadia i sin presentashon di un petishon di asilo”.
Manera e konservador, Friedrich Merza, a anunsiá promé di a pone su mes na kabes dje pais, e migrashon, ku ta e tema ku a monopolisá e kampaña elektoral parlamentario despues di un seri di atake kometé pa estranheronan, ta e promé asuntu kontra kua gobièrnu lo aktua, despues di a sinta djamars último.
Segun deklarashonnan na kuminsamentu di mei dje sosial demokrat Nancy Faeser, ku tabata promé ku Dobrindt den e ministerio, mas ku 53.000 persona a keda ekspulsá na fronteranan aleman for di òktober di 2023.
