KIEV, UKRANIA (AFP).- Alemania a anunsiá un yudansa militar nobo pa Ukrania, na un momento ku Oksidente ta purba na duna garantianan di sigui apoyá e pais den su lucha kontra di invashon ruso. Ademas dje minister di defensa aleman, Boris Pistorius, tambe tabata presente na Kiev e presidente di Konseho Europeo, Charles Michel, i e mandatario di Moldavia, Maia Sandu, pareu ku selebrashon dje di dies aniversario dje revolushon pro-europeo di Maidán, ku a deroká un gobièrnu pro ruso.
Pistorius a anunsiá un yudansa militar di 1.300 mion euro (den kareda di 1.400 mion dòler), ku ta inkluí kuater sistema nobo di defensa antiaéreo Iris-T Slm i munishon di artieria, ku Ukrania tin mester ku gran urgensia.
E minister, ku a realisá e anunsio despues di un reunion ku su homólogo ukraniano Rustem Umerov, a garantisá na Ukrania e “solidaridat” di Berlin.
Michel a biaha pa Kiev pa “ekspresá e firme apoyo di Union Europeo (UE)” i prepará ku e presidente ukraniano, Volodimir Zelenski, e kumbre europeo programá pa dianan 14 i 15 di desèmber na Brussel.
E dirigente ukraniano a deklará den un konferensia di prensa di ta spera “un resultado, un desishon polítiko pa start ku e negosiashonnan” pa su pais drenta den Union Europeo
”Nos a hasi tur loke nos por a hasi i lo hasi esaki tambe”, segun Zelenski relashoná ku e kondishonnan pa su pais drenta den e organisashon.
E mandatario mas aleu a reuní ku sekretario di defensa di Merka, Lloyd Austin, kende a re-afirmá e apoyo di su pais i a menshoná un yudansa militar nobo di 100 mion dòler.
Meta dje apoyonan aki ta pa trankilisá Kiev, ku tin miedu ku su aliadonan lo redusí nan yudansa, mas ainda ora ku e konflikto entre Israel i Hamas ta hala tur atenshon internashonal riba e suseso den e region ei.
