Aeropuerto José Marti na La Habana, Cuba, poko poko ta kedando sin kompanianan grandi di aviashon.
BERLIN (AFP).- Alemania ayera a deskonsehá tur biahe no esensial pa Cuba kaminda e preshon di Merka ta provokando un krísis energétiko. E isla karibense ta pasando den un krísis energétiko grave despues di interupshon di suministro di petrolio for di Venezuela riba òrdu di Washington. Merka a tuma e paso aki despues ku tropanan norteamerikano a kapturá e lider venezolano Nicolás Maduro.
“Cuba ta enfrentando un krísis energétiko serio, ku ta bira mas grave debí na infrastruktura energétiko den hopi mal estado”, segun e ministerio aleman di eksterior den su aviso. “E pais ta sufri di falta di energia i kombustibel, loke ta afektá tur kos, inkluso atenshon médiko”, segun el a agregá. E boletin ta konsehá pa kanselá tur biahe no importante i ta señalá ku aktualmente avionnan prosedente di ekstranhero no por tuma kombustibel na Cuba, loke ta provoká “restrikshonnan importante den e operashonnan aéreo”, i ku “vários hotèl ya a sera nan portanan”.
“Transporte públiko, lusnan di tráfiko, kaheronan outomátiko i sistemanan di komunikashon i seguridat ya ta gravemente restringí òf por faya”, segun a duna di konosé.
Gobièrnu kubano a anunsiá medidanan di emergensia, inkluso un siman laboral di kuater dia pa empresanan estatal i restrikshon den benta di kombustibel.
Air Canada djaluna a anunsiá suspenshon di buelonan pa Cuba pa falta di garantia di suministro di kombustibel na aeropuertonan dje pais. Djis despues, tantu Air Transat komo WestJet a hasi e mesun anunsio.
