BERLIN, AP.- Un sirio buská na Alemania pa supuesto preparashon di un atake ku bòm a wòrdu detené pa tres kompatriota di dje, kende a mar’é den su apartamentu i a yama polis, segun outoridat a informá djaluna. E detenshon di Jaber Albakr,di 22 aña, a pone fin na un búskeda di dos dia kual a kuminsá na momentu ku vários kilo di eksplosivo i komponente a paresé den un apartamentu di e siudat oriental di Chemnitz djasabra.
Albakr a yega Alemania aña pasá komo parti di un ola di 890.000 buskadó di asilo. E hefe di polis kriminal di Sajonia, Joerg Michaelis, a bisa ku e tres sirionan ku a kaptur’é a rekonosé e sospechoso riba potrètnan polisial publiká riba Internèt.
E fiskalnan i polis a bisa ku a konsiderá Albakr, komo un ekstremista ku supuesto vínkulo ku e grupo Estado Islámiko. E agensia di inteligensia interior a vigil’é desde sèptèmber i a alertá gobièrnu di Sajonia tokante su plan di djabièrnè, segun outoridat a informá.
Albakr, di zona di Damasco, na Siria, a hui di outoridatnan djasabra durante un redada den su apartamentu di Chemnitz. Investigadornan a bisa ku a haña “vários shen gram” di un eksplosivo volatil, sufisiente pa kousa dañonan importante, skonde den e kas.