Pagatinu; gastu di entre Fl 10 pa Fl 15 ora lanta sen na otro ATM
WILLEMSTAD.-Den e dianan aki varios ta esnan ku a aserka EXTRA ku reklamo pa gastunan haltu di transakshon na momentu ku hasi uso di karchi di banko. Un chekeo ku e karchi nobo di banko RBC enberdat ta mustra ku si hasi uso di e karchi aki pa lanta sen na un otro ATM, e no ta kobra 2 florin na luga di 1 florin manera den pasado. Awendia ora usa un karchi di banko, estilo nobo, na ATM di un otro banko esei por kosta e kliente entre Fl 10 te ku Fl 15 florin na gastu. Nos a test i komproba esei.
E rekomendashon na tur usuario ta pa pone bon atenshon ora ta usa e karchinan di banko nobo ya ku e gastu di transakshon por resulta hopi haltu.
Entretantu por a tuma nota di un informe di Banko Sentral di Korsou i Sint Maarten ku ta duna algun splikashon riba e asuntu.
Den su informe Banko Sentral ta bisa pa ‘limitá oumento di e gastunan di transakshon hasí ku tarheta di débito ta un di e puntonan di akshon prinsipal ku a sali for di e di dos reunion di National Payment Council (NPC). Awor ku e tarhetanan di débito a bira Mastercard i Visa, no ta tur transakshon hasí ku e tarhetanan akí na mashin di pago (terminal Point-of-Sale) i ATM ta ser prosesá komo transakshon lokal i esaki a hiba na un oumento den gastu di transakshon. Pa por garantisá un sistema di pago sigur i efisiente, ta esensial pa, riba korto plaso, tur mashin di pago i ATM ta konfigurá na un manera uniforme.
