Alerta na mayornan pa “Momo challenge”

Peliger pa muchanan ku uso di internet no supervisá

WILLEMSTAD.- Plataforma di derechinan di mucha (IVRK) a tuma nota di e asina yamá “Momo challenge”. Esaki ta un pòpchi ku lo mester ta aparesé den vidionan riba YouTube òf weganan online i ta menasá e muchanan i/òf duna nan instrukshon pa hasi daño na nan mes i/òf na otro.
“Momo challenge” ta un fenómeno ku ta eksistí for di medio 2018 i ku na febrüari di e aña aki a lanta mas konsternashon mundialmente. Den pasado a yega di tin mas tipo di fenómeno asina’kí. No por ekskluí ku lo por tin otro fenómenonan manera esaki den futuro, p’esei Plataforma IVRK ke alertá tur mayor i edukadó (profeshonal) pa ta konsiente di kiko nan yu, alumno o kliente ta wak tantu na televishon, komo riba kòmpiuter, tablet òf telefòn.

E Tratado di Derechinan di Mucha ta preskribí ku mucha tin derechi riba tempu liber i mucha tin derechi di hunga. Sin embargo, ta konosí ku tempu liber di mucha, asta mucha bou di 4 aña, ta konsistí kada dia mas di weganan digital òf material oudiovisual riba internèt. YouTube ta un medio sosial ku muchanan ta aktivo ariba, asta promé ku nan siña lesa i skibi i ounke tin material ku por kontribuí na un mucha su desaroyo, tin kontenido ku no ta apropiá pa nan.
Spesífikamente riba YouTube, fásilmente un mucha di kualke edat por sigui klek i wak kontenido ku por te asta forma un peliger pa su bienestar. Apesar ku tin diferente manera pa un mayor òf edukadó por haña sa kiko e yu, alumno o kliente a wak, ta sumamente rekomendabel pa no laga muchanan, riba telefòn, tablet òf laptop/kòmpiuter sin supervishon direkto di un persona responsabel mayor di edat. Ta bon pa kuminsá siña nan mas trempan posibel (for di mas o ménos 4-6 aña) pa bira konsiente di posibel peligernan, ku wakmentu di vidio riba YouTube por trese kuné. E peliger prinsipal ta sintá den e echo ku e usuario (sea mucha òf adulto) ta haña kontenido sugerí dor di YouTube mes i no semper e kontenido aki ta apropiá, spesialmente den kaso di mucha. Kontenido no apropiá por konsistí di: lenguahe no apropiá, agresividat verbal i/òf físiko ku òf sin arma i kontenido seksual no apropiá.
Hopi importante ta pa semper e mayor subi e site i appnan i traha den nan promé ku e laga e yu subi nan. Asina e por wak kua ta adekuá pa su yu. E wega i vidionan mester kuadra ku loke e mucha por i ta komprondé.
Na Kòrsou tin instansianan ku ta duna asistensia na tur ku tin nesesidat di esaki tantu den edukashon, pero tambe den e área spesífiko manera konosementu di wega digital i medionan sosial. Un di e instansianan aki ta Sentro pa Inovashon i Guia Edukashonal (www.sige.cw òf 738 65 70).
Komunidat por akudí tambe na Sentro pa Famia i Hubentut di Ministerio di Desaroyo Sosial, Labor i Bienestar pa informashon.

SHARE

LEAVE A REPLY