Nos ta rekordá Alexandra Atalita dor di su trayekto den e mundu di beyesa, spesífikamente na Miss Earth Kòrsou 2018 i su partisipashon na Miss Universo Kòrsou 2021, kaminda el a gana e premio di promé finalista. Awor, Alexandra ta traha riba un proyekto masha interesante na Hulanda ku ta habri porta pa damanan di tur edat di Karibe ku ke partisipá den sertámen di Miss.
Amor pa mundu di beyesa
Alexandra ta bisa ku su amor pa e mundu di beyesa a kuminsá for di ora e tabata mucha. Segun e, un parti di su inspirashon a bini dor di su mama, ku tabata un diseñadó. E ta indiká ku e ambiente kreativo i e moda den kual el a krese tabata fundamental pa e desaroyá su interes pa sertámennan di beyesa. E ta suprayá ku den su famia, wak sertámennan manera Miss Venezuela, Miss USA i naturalmente Miss Kòrsou tabata un aktividat regular. E momentunan aki tabata lanta su deseo pa un dia e partisipá den un sertámen grandi. Alexandra ta bisa ku su pasenshi i dedikashon a paga, eventualmente el a logra realisá su soño i partisipá den Miss Earth Kòrsou 2018 i Miss Universe Kòrsou 2021, kaminda el a sali promé finalista.
Un soño
Alexandra ta bisa ku su soño di partisipá den sertámennan di beyesa semper tabata tei. Desde ku e tabata tin 13 aña, el a kuminsá modelá. E ta indiká ku den e fase aki, el a siña kon pa resaltá un paña, kon pa hasi make-up i kon pa presentá bo mes ku siguridat, tur kos ku ta fundamental pa un Miss. Sinembargo, Alexandra ta bisa ku e tabata mas enfoká riba modelá i ménos riba e aspekto di komunikashon i presentashon públiko. E ta menshoná ku ora el a bai biba Hulanda, e sintimentu pa persiguí su soño di bira Miss Kòrsou a keda bibu. E tabata konsiente ku pa logra esaki, e mester haña eksperensia i siña kon pa papia dilanti di públiko. E ta agregá ku esaki tabata un di e retonan mas grandi ku e mester superá. Pa duna su mes e oportunidat pa krese, el a partisipá den su promé sertámen di beyesa, Miss Beauty of Noord-Brabant, paso na e momentu ei e tabata biba den e stat aki. Den e sertámen, el a sali promé finalista, un eksperensia ku e ta konsiderá esensial pa su desaroyo.
Alexandra ta sigui konta ku el a risibí un yamada for di Kòrsou ku a puntra e si e ta interesá pa representá su isla na Miss Earth na Filipina. Esaki tabata un oportunidat grandi. E ta konkluí ku esei tabata e parti ku a kontribuí na yega na su partisipashon na Miss Universo Kòrsou, kaminda el a sali promé finalista.
Di modelo pa miss riba pasarela
Alexandra ta menshoná ku e tabata un barera hopi grandi. ‘Mi tabata tin ansiedat. Kemen pa ami, mi mester a bisa mi mes, mi tin ku kibra e barera aki. Mi tin ku papia dilanti hende, bisa mi opinion kiko mi ta pensa. Esei a tuma hopi entrenamentu. Lokual ku ami a hasi den mi trayekto pa Miss Kòrsou tabata ku mi tabata traha vlogs, video di mi dia. “Promé mi tabata tin hopi miedu pa firma mi mes. Pero bo ta papia ku e kámara i kuminsá artikulá un tiki mas mihó”. Asina bo ta saka bo mes for di bo zona konfortabel. I mi ta kere, esei a yuda. Ta manera bo ta papia ku un spil bo dilanti. Komo e ta un video, bo lo por wak e bek i perfekshoná bo mes pa e por ta mihó e siguiente bia’, Alexandra ta bisa.
Di studia te kasa
Alexandra ta bisa ku awor aki ta e tin 13 aña ta biba na Hulanda. El a bai Hulanda ku 19 aña pa bai studia. Su estudio tabata Media & Entertainment Management. Ei kier a bira produktor. Awor aki e ta traha den Marketing & Social Media. “Mi a kasa tambe i mi a keda einan. Mi lo bin Korsou bek, pero pa awor aki lo mi keda Hulanda”.
Miss Universe Netherlands
Pues, manera Alexandra a menshoná, el a partisipá na Miss Beauty of Noord Brabant. Aña pasa e franchise di Miss Netherlands a bai pa Miss Beauty. Nan ta organisá sertámen nan provinsial. Alexandra ta splika ku e organisashon a kòrda ku dia el a partisipá ku e tabata orguyoso di por biba i studia einan, pero ta yu di Kòrsou e ta. Ku esei den mente, nan a pensa ku tin mas dama manera e ku tambe lo ta interesá den partisipá ku kisas no ta partisipá komo nan ta bisa “no, mi no ta sinti mi un Miss Groningen’. Nan a yama mi i puntra mi ki mi ta pensa di e idea aki. I mi a pensa: “Oh, nos ta orguyoso di kaminda nos ta pero alabes nos ta biba na Hulanda.” Asina a bin kombiná e dos intenshonnan aki i krea e sertámen ‘Miss Universe Dutch Caribbean’, kual ta trayekto 13 den Miss Universe Netherlands.
Di asombrá pa hopi reakshon
Na promé instante tur hende tabata asombrá, Alexandra a bisa. Tabata tin un par di komentario negativo, manera den e sentido di kon nos mester di dje. Pero mayoria komentario ta positivo, mirando ku nos tin basta inskripshon. Tin 8 dama di Karibe ku ta repartí den e islanan, 2 di Aruba, 5 di Kòrsou i 1 di Sint Maarten. Hopi hende ta mira e komo un rekonosementu pa Karibe. Nos mester ta orguyoso di kaminda nos ta bini. Nos mester por usa nos bos pa bisa otronan di unda nos ta bin. Ta algu grandi ku nos tin e oportunidat pa representá nos islanan na Hulanda.
Pa partisipá tene kuenta ku esaki
Alexandra ta splika ku loke ta importante ta pa ta sigur di bo mes. Den e trayektoria aki lo bo bai enfrentá asina tantu situashon ku bo no lo por imaginá. Bo lo pensa kisas ku bunitesa so ta hunga un ròl. Aparte di esaki, bo mester ta inteligente, bo mester por komuniká bon I presentá bo mes. Hende ta interesá den kiko bo ta para pe. Esaki ta loke Alexandra ta siña e damanan pa medio di charla di empoderashon, entrenamentu kon pa presentá i desaroyá bo mes mas mihó.
Timides
E prome paso pa kibra e barera ta pa no tin miedu pa kuminsá, pa sali for di bo zona di konfortabel. E promé bia bo ta pensa ku el a bai totalmente malu, pero mas bo hasi e, mas mihó e ta bira. E organisashon ta duna guia kon pa fortalesé bo siguridat, asina bo por ta mas sigur di bo mes i mas representabel, Alexandra ta splika.
Sponsorship diferente na Hulanda kompará ku Kòrsou
El lo bisa ku na Kòrsou e ta mas fásil. Na Kòrsou sertámen ta algu ku nos tur ta rekonosé I ke wak. Nos kier sa ken ta bai bira e próksimo Miss Kòrsou. Miss Universo ta un plataforma ku nos ta usa pa promové nos mes. E echo ku nos a sali den e tòp 10 ta un logro grandi pa nos.
Na Hulanda, e ta hopi mas difísil, komo e no ta wòrdu mira komo un manera pa bende e pais. Alexandra ta menshoná ku e ta enfoká riba antianonan ku ta biba na Hulanda. Awor ku tin e plataforma grandi di Miss Netherlands esaki ta duna e oportunidat pa nos por biba ku nos hendenan den e momentu.
E siguiente paso di Miss Netherlands
Dia 2 di febrüari e finalnan provinsial ta kuminsá, kual kada bes lo selekshoná un Miss. Dia 6 di aprel ta e sertámen di Miss Netherlands Dutch Caribbean na Veenendaal, Alexandra ta bisa. E evento ta sentral komo ku e damanan ta bini di tur kaminda. E último elekshon ta e sertámen nashonal kaminda tur e damas ta bai huntu. E final di Miss Universe Netherlands ta 5 di juli, ku e ganadó ta bai representá nos na Miss Universe. Banda di e elekshon tin mas aktividat. Un ehèmpel ta bishita di spònser, charla di empoderashon, cocktail I diferente otro aktividatnan. Esaki ta forma parti di e plan di preparashon pa e evento mas grandi.
E di 13 provinsial
Alexandra ta splika ku tin 12 provinsial di Hulanda, I esun di 13 ta e Miss Netherlands Dutch Caribbean. Ademas, tin e posibilidat di ‘wildcard’, ku ta wòrdu selektá a base di mas tantu voto I e persona ku a hinka mas esfuerso pa kontribuí ku fundashon Simavi. Esaki ta engrandese e posibilidat ku kisas nos lo por tin dos dama di Dutch Caribbean den e sertámen final. Lastu aki tabata tin un kaminata di e fundashon Simavi ku a tuma lugá den awa seru, sneu I friu. Tabata tin mas ku 500 Miss. Miss Netherlands Dutch Caribbean, ku solamente 8 dama a sali komo e provinsial ku a rekobrá mas tantu fondo.
Eksperensia úniko
Alexandra ta suprayá ku e eksperensia ta unu úniko. Komo el a partisipá den e sertámen i awor ta sinta na e otro banda di e medaya, den e parti organisatorio. Loke ta mas importante pa Alexandra ta mira e desaroyo di e damanan. ‘Mi ta hopi orguyoso di nan, i mi lo ke kontinuá hasi esaki, kreá hende muhé ku ta sigur di nan mes i ku por ta orguyoso di unda nan ta bini’, Alexandra a bisa.
Ta algu grandioso pa nos lo por wak e sertámen i mira nos damanan eksela. Nos ta deseá Alexandra tur klase di éksito den su trayekto, i nos damanan ku lo bai sobresalí.
